Нийслэлийн ИТХ-ын Тэргүүлэгчид хуралдаж Улаанбаатар хотын хог хаягдлын менежментийг сайжруулах хөтөлбөр батлах тухай, хог тээвэрлэгчийг сонгон шалгаруулах, санхүүжүүлэх үйлчилгээний хураамжийг төвлөрүүлэхэд мөрдөх журмын тухай зэрэг хэд хэдэн асуудлыг хэлэлцэн тогтоол гаргалаа.

Улаанбаатар хотын хог хаягдлын менежментийг сайжруулах хөтөлбөрийг Улаанбаатар хотын Ерөнхий менежер бөгөөд Захирагчийн ажлын албаны дарга Б.Бадрал Тэргүүлэгчдэд танилцууллаа. Нийслэлийн иргэдийг эрүүл, аюулгүй орчинд амьдрах нөхцлийг бүрдүүлэхэд хувь нэмрээ оруулах хог хаягдлын менежментийн тогтолцоог бий болгох зорилгоор хог хаягдлын менежментийг сайжруулах хөтөлбөрийг боловсруулж байгаа бөгөөд хоёр үе шаттайгаар хэрэгжүүлнэ гэж төлөвлөсөн байна. Захирагчийн ажлын албаны тооцоолж байгаагаар өнгөрсөн онд өвлийн улирлалд өдөрт дунджаар 1237,2 тонн хог хаягдал үүсжээ. Үүнээс 145,7 тонн хог хаягдалыг орон сууцанд амьдарч буй айл өрхүүд,  харин гэр хороолллын айл өрхүүдээс 690,8 тонн, аж ахуйн нэгжийн үйл ажиллагаанаас 159,9 тонн хог хаягдал гардаг байна. Энэхүү хөтөлбөрийн хүрээнд хог хаягдлын удирдлагын бүтэц, зохион байгуулалтыг боловсронгуй болгож, хог хаягдлын менежментэд дүүргүүд голлох үүрэгтэйгээр оролцоно гэдгийг тусгажээ. Мөн хог цуглуулах, тээвэрлэх үйл ажиллагааг системчлэхээр өөрчлөлт оруулжээ. Тухайлбал цэвэрлэгээнээс гадуур газар үлдээхгүйн тулд дүүргүүд нутаг дэвсгэрээ бүсчилэх, гудамж талбайн хэмжээгээр хүн хүч, техникийн тоог тодорхойлон хувиарлах, хууль журмын дагуу тээвэрлэгчийг сонгон шалгаруулах, санхүүжүүлэх зэрэг ажлыг хийх юм байна. Мөн хөтөлбөрийн хүрээнд Улаанбаатар хотын баруун, зүүн хэсэгт тус бүр хог боловсруулах үйлдвэр барьж 2015 оны эцэс гэхэд ашиглалтанд оруулахаар төлөвлөжээ. Хог цэвэрлэх, цуглуулах, зөөх ажлыг дүүргүүдэд хариуцуулж, харин НЗДТГ болон Захирагчийн ажлын алба, ерөнхий хяналт тавин ажиллах юм байна. Хог хаягдлын менежментийг сайжруулах хөтөлбөрийг Нийслэлийн ИТХ-ын тэргүүлэгчид хэлэлцэн дэмжлээ.

Хог хаягдлыг шинэ журмаар тээвэрлэнэ

Нийслэлийн ИТХ-ын тэргүүлэгчдийн хуралдаанд Хог тээвэрлэгчийг сонгон шалгаруулах, санхүүжүүлэх, үйлчилгээний хураамжийг төвлөрүүлэхэд мөрдөх журамын төслийг Захирагчийн ажлын албаны дарга Б.Бадрал танилцууллаа.  Энэхүү журмаар Нийслэлийн айл өрх, байгууллага, аж ахуйн нэгжийн хог хаягдлыг цуглуулж, тээвэрлэх байгууллага, аж ахуйн нэгжийг сонгон шалгаруулах, Хог хаягдлыг цуглуулж, тээвэрлэх үйлчилгээг санхүүжүүлэх, хог хаягдлын үйлчилгээний хураамжийг төвлөрүүлэх зэрэг үйл ажиллагааг зохицуулах юм байна. Дүүрэг бүр харъяа хэд хэдэн хороодыг нэгтгэж бүсүүдэд хуваах ба нэг бүсэд нэг тээвэрлэгч байхаар сонгон шалгаруулалтыг дүүргийн Засаг даргын захирамжаар байгуулагдсан ажлын хэсэг сонгон шалгаруулах юм байна.

Тухайн шалгарсан этгээдтэй дүүргийн Засаг дарга гэрээ байгуулж, сар бүр хог цуглуулж, тээвэрлэсэн ажлын гүйцэтгэлээр санхүүжилтийг олгохоор журамлажээ. Гэхдээ санхүүжилтийг олгохдоо тухайн бүс хороо хог хаягдалгүй байх гэсэн үндсэн шалгуурыг тавих юм байна. Хамгийн чухал нь их хог тээвэрлэхдээ бус тухайн орчин цэвэр цэмцгэр хоггүй байх нь чухал гэдгийг Б.Бадрал дарга онцоллоо.

Журмын дагуу хог тээврийн гэрээг хэд, хэдэн шалгуур үзүүлэлтээр дүгнэхээр тусгажээ. Тухайлбал байгууллага, аж ахуйн нэгж, иргэдийн хог тээвэр, цэвэрлэгээний талаарх сэтгэл ханамж, байгууллага, аж ахуйн нэгж, иргэдээс ирсэн санал, гомдол, Хорооны Засаг даргын тодорхойлолт, хог хаягдлыг цуглуулж, тээвэрлэх хуваарь, маршрутыг мөрдөж ажилласан байдал, ил задгай үүсмэл хогийн цэгүүдийг устгасан байдал, машин техникийн эвдрэл, гэмтэл зэрэг шалгууруудаар гэрээний биелэлтийг дүгнэх юм байна.  Шалгуур үзүүлэлтийн дагуу “Хог цуглуулж, тээвэрлэх гэрээ”-г дүүргийн Засаг даргын Захирамжаар байгуулагдсан ажлын хэсэг, Улаанбаатар хотын Захирагчийн Ажлын Алба хамтран дүгнэж, гэрээг сунгах, урамшуулах, цуцлах эсэх асуудлыг дүүргийн Засаг дарга шийдвэрлэхээр журамласан байна. Мөн  Сонгон шалгаруулалтад илт худал мэдээлэл ирүүлсэн, сонгон шалгаруулалтыг санаатайгаар будлиантуулсан этгээдийг дахин сонгон шалгаруулалтад оролцуулахгүй байх нөхцлийг бүрдүүлж, журмыг зөрчсөн тохиолдолд холбогдох хууль тогтоомжийн дагуу хариуцлага тооцох юм байна. Нийслэлийн ИТХ-ын Тэргүүлэгчид хог ихтэй газрууд хоггүй цэвэр болсон байх нь энэхүү шинэ журмын үр дүн шүү, дүүргүүд өөрсдөө тухайн хэсгээ хариуцаж авах нь зөв зохицуулалт байна. Тиймээс журмын дагуу хариуцлагаа тооцож ажлаа эрчимжүүлэх хэрэгтэй гэв. Нийслэлийн ИТХ-ын Тэргүүлэгчид хог тээвэрлэгчийг сонгон шалгаруулах, санхүүжүүлэх, үйлчилгээний хураамжийг төвлөрүүлхэд мөрдөх журмыг батлан тогтоол гаргалаа. Энэхүү журам батлагдсантай холбогдуулан НИТХ-ын Тэргүүлэгчдийн 2012 оны 30 дугаар тогтоолыг 2013 оны  3-р сарын 31-ний өдрөөр хүчингүй болгохоор тогтоолоо гэж Нийслэлийн Хэвлэл мэдээлэл, Олон нийттэй харилцах хэлтсээс мэдээллээ.