МАН, МАХН гэх хоёр нам эвсэх, нэгдэх тухай яриа сүүлийн үед хүчтэй боллоо. МАХН-ын дарга Н.Энхбаярыг МАН-ын дарга Ө.Энхтүвшин хорих ангид эргэж очсон цагаас хойш У.Хүрэлсүхийн генсек байх үед салсан нам эргээд нийлэх боломжтой талаар УИХ дахь гишүүд нь үг унагах болсон. МАХН-ынхан ч тэр, МАН-ынхан ч тэр. Харин өчигдөр Ө.Энхтүвшин дарга Д.Загджав, Р.Раш нарын байгуулсан “МАН-ыг шинэчлэх эв нэгдлийн хороо”-ны хоёр намыг нэгдэхийг уриалсан бичгийг нааштайгаар хүлээн авчээ.

     Ө.Энхтүвшин МАН-ын дарга болсон цагаасаа хойш МАХН-ын хувьд аядуу бодлого барьж иржээ. Орон нутгийн сонгуулийн өмнө Н.Энхбаярыг хорих ангид эргэсэн, өлсгөлөн зарласан ээж нарт байнга санаа тавьж очиж байсан гээд түүний МАХН-ынханд элэгтэй байгаа нь харагдаж байсан. МАН-ын өөр лидер байсан бол ийм алхам хийнэ гэхэд хол санагдах байсан биз. Тэрбээр “Хоёр намын эв нэгдлийг хангахад татгалзах шалтгаан алга. Гол нь дан ганц МАН-аас хамаарах асуудал биш учраас МАХН-ын удирдлага, мөн гишүүдтэй ярилцаж уриалгаа хүргүүлэх ёстой. МАХН-ын зүгээс хүлээн зөвшөөрвөл МАН-ын төвшинд татгалзах шалтгаан байхгүй” гэсэн хариу өгсөн байна. Тиймээс сүүлийн үед байн байн хуралдах болсон МАН-ын Удирдах зөвлөл, УИХ дахь бүлгийн гишүүд хэлэлцээд үндсэндээ зөвшөөрсөн бололтой гэж эх сурвалж мэдээлэв.   Тиймээс Ерөнхийлөгчийн сонгууль дөхөж, аль аль нь нэр дэвшигчийн ацан шалаанд ороод байгаа энэ үед МАН, МАХН-ынхан эвсэх эсэх нь Н.Энхбаяраас шалтгаалах боллоо. Үүнд гол үүрэг гүйцэтгэж яваа гэх Д.Загджав ч эртнээс ийм акци хийнэ гэдгээ төлөвлөж байсан бололтой. Н.Энхбаярыг эргэх гэж олон хүн хөөцөлдөж, хүсэлт тавьсан ч МАН-ын гишүүд дундаас /Ө.Энхтүвшинг эс тооцвол/ ганцаараа уулзаж чадсан. Тухайн үед олон хүн тэд уулзаад юу ярьсан талаар сонирхож байсан ч Д.Загджав нэг ч үг унагаагүй. Харин тэр үед л хоёр намыг нэгтгэх ажлын эхлэлийг тавьж байсан бололтой юм. Зарим эх сурвалжууд Д.Загджав өөрийн санаачлагаар биш Н.Энхбаярын хүсэлтээр ийнхүү хоёр намыг нэгтгэх аянг эхлүүлсэн гэх бор шувуу аль хэдийн нисч эхэлжээ. Хэрэв энэ үнэн бол Н.Энхбаяр МАН-ынхны урилга, заллагаар хоёр намаа нэгдэхийг зөвшөөрсөн хүндтэй хүн болж хувирах юм. Ерөнхийлөгчийн сонгууль тун дөхөж буй тул энэ үйл явц ч хурдтай өрнөх вий гэж зарим нь ярьж байна. Тиймээс МАН, МАХН нэгдэнэ гэдэг холын биш тун ойрын, гайхах биш боломжтой хувилбар болоод явчихлаа.

   Намууд салах, нэгдэх нь улс төрд байдаг л үзэгдэл. Харин МАХН толгойлж Засгийн газарт орсон “Шударга ёс” эвслийг яах вэ? гэдэг асуулт ургана. МАХН Засгаас гарч МАН-ын сөрөг хүчний статусд шилжих үү эсвэл...?