Бүгд найрамдах Өмнөд Судан улсын Лейкс мужийн нэгэн дунд сургууль Монгол улсын төрийн тэргүүний нэрэмжит болжээ. “Дэлхийн хамгийн залуу тусгаар улс дахь энхийг сахиулах үйл ажиллагаанд Монгол улсын гүйцэтгэж буй дэмжлэгт талархан, тус мужид анх удаа айлчлан ирсэн төрийн тэргүүнийг хүндэтгэн ийм шийдвэр гаргаснаа мэдэгдэж байна” гэж Лейкс мужийн удирдлагын албан ёсны мэдэгдэлд дурджээ.
   Ерөнхийдөгч Ц.Элбэгдорж шинэхэн тусгаар улсын хүүхэд багачуудын сурч боловсрох сургууль өөрийнх нь нэрэмжит болсонд талархаж байгаагаа илэрхийлээд “Энэ бол Монгол улсын энхийг сахиулагчдын үйл ажиллагаанд орон нутгийн иргэдийн тавьж байгаа эерэг дүнгийн нэгэн илрэл, хоёр орны хамтын ажиллагаа, найрамдлын их өөдрөг эхлэл” гэж хэлжээ. Ерөнхийлөгч мөн өдөр Өмнөд Суданы нийслэл Жуба хотын нэгэн дунд сургуулийн үйл ажиллагаатай танилцжээ.

   Өмнөд Судан дахь энхийг сахиулагчдынхаа үйл ажиллагаатай танилцсан Монгол улсын ерөнхийлөгч Ц.Элбэгдорж бямба гарагт Лейкс мужийн Румбек хот дахь цэргийн баазад хүрэлцэн ирэв. Тус баазад Монгол улсын зэвсэгт хүчний 850 хүн бүхий энхийг сахиулах батальоны нэг хэсэг байрлан үүрэг гүйцэтгэж байгаа юм. Ерөнхийлөгчийг НҮБ-ын тусгай онгоцоор хүрэлцэн ирэхэд цэргийн ангийн бие бүрэлдхүүн хүндэтгэн жагсаж угтжээ. Билгийн тооллын хаврын эхэн сарын шинийн 6-ны өдөр алс хол Африк тивд алба хааж байгаа цэргүүд ерөнхий командлагчтайгаа золголт хийж, төрийн одон медалиар энгэрээ мялаасан байна.

-НҮБ-ын болон орон нутгийни удирдлага манай энхийг сахиулагчдын талаар ам сайтай байна. Энэ бол эх дэлхийн энх тайвныг сахин хамгаалах үйлсэд Монгол улсын оруулж буй хувь нэмэр, нэр хүндийг нэмэгдүүлэн бэхжүүлэхэд оруулсан та бүхний гавьяа юм гэж цэрэг дайчиддаа хандан хэлсэн үгэндээ Ц.Элбэгдорж онцлон тэмдэглэжээ. Мөн тэрээр цэргийн алба хаасан болон энхийг сахиулах ажиллагаанд оролцсон цэрэг дайчдад цаашид төрийн алба хаах болон бусад шалгуурт төрөл бүрийн хөнгөлөлт үзүүлэх чиглэлээр холбогдох хууль тогтоомжид өөрчлөлт оруулахаар судлаж байгаагаа мэдэгдэв.
   Цагийн байдал,байгаль цаг уурын эрсдэлтэй нөхцөлд үүрэг гүйцэтгэж байгаа олон монгол дайчин “Улсынхаа ерөнхийлөгчтэй золгон тамхиллаа. Сайхан байна. Ар гэрээс аав эргэлтээр ирэх шиг боллоо” гэж сэтгэл дүүрэн байлаа.
    Бүгд найрамдах Өмнөд Судан улсад НҮБ-ын энхийг сахиулах ажиллагаанд оролцож буй Монгол улсын зэвсэгт хүчний цэргийн ангийин үйл ажиллагаанд сэтгэл дүүрэн байгаа гэж НҮБ-ын ерөнхий нарийн бичгийн дарга Бан Ги Мүн мэдэгдэв. Тэрээр энэ тухай бямба гарагт Монгол улсын ерөнхийлөгч Ц.Элбэгдоржтой утсаар ярилцахдаа онцлон тэмдэглэжээ. Ерөнхийлөгч Ц.Элбэгдорж өөрийн улсаас илгээсэн энхийг сахиулагчдаа эргэн, шинэхэн тусгаар тогтносон улсад айлчилсан анхны төрийн тэргүүн болж байгаа нь томоохон үйл явдал гэж НҮБ-ын Ерөнхий нарийн бичгийн дарга хэлжээ.

    Ц.Элбэгдорж Өмнөд Судан дахь энхийг сахиулагчдынхаа үйл ажиллагаатай газар дээр нь танилцсанаа мэдээлээд НҮБ-ын хамгийн шинэ залуу гишүүн улсад энх тайван тогтооход Монгол улсад цаашид ч идэвхийлэн оролцох болно гэв. Ерөнхийлөгч болон Ерөнхий нарийн бичгийн дарга хоёрын ярианы үеэр мөн шинэ оны өмнө Өмнөд Суданд буудуулж сүйрсэн Оросын баг бүхий НҮБ-ын нисдэг тэрэгний тухай хөнджээ. Бан Ги Мүн энэ явдлыг онцгойлон анхаарч мөрдөн шалгаж байгаа гэжээ.
Ц.Элбэгдорж Монгол улсын тэргүүлж байгаа Ардчилсан орнуудын хамтын нийгэмлэгийн 4 дүгээр сард Улаанбаатарт болох  ээлжит хуралд НҮБ-ын ерөнхий нарийн бичгийн даргыг уг хуралд урьсан байна.