Монголын үндэсний бөхийн холбооны Тэргүүлэгчдийн зөвлөлийн хурал өнгөрсөн мягмар гаригт болжээ. Энэ хурлаар Усан могой жилийн сар шинийн барилдааны дөрвийн даваанд зүй бус үйлдэл гаргасан улсын заан Ч.Санжаадамбын барилдах эрхийг хоёр сараар хасахаар шийдвэрлэсэн байна.

Ч.Санжаадамба улсын начин Б.Батмөнхтэй барилдах үеэр “Монголын үндэсний бөхийн барилдааны дүрэм”-ийн 4.4-ийн “Д”-д заасан ...гутлын өлмий дээр гишгэж мэх хийж унагавал дахин барилдуулна гэсэн заалтын дагуу хөлийн цэц дахин барилдуулахаар шийдвэрлэсэн юм. Гэвч тэрээр дахин барилдахаас татгалзаж эсэргүүцэн, бүдүүлэг үг хэлэх зэргээр төрт ёсны их баяр ёслолын үеэр олон нийтийн өмнө жудаггүй аашилсан учраас дээрх шийдвэрийг гаргажээ.

Тиймээс дүрмийн 7.3-ийн “Г” заалтыг үндэслэн улсын заан Ч.Санжаадамбын барилдах эрхийг хоёр сараар түдгэлзүүлж, гурав давсан бөхийн байг олгохгүй байхаар тогтжээ.