Олон улсын эмэгтэйчүүдийн баяр буюу бидний хэлж заншсанаар “Мартын 8”-ны өдөр тохиож байна.  Бүх л хүмүүс ээжийгээ, эхнэрээ, бүсгүйчүүдээ хэрхэн баярлуулах талаар бодож байгаа энэ л мөчид хамгийн гэгээлэг  бэлэг болох тоглолт үзвэрүүдийн мэдээллийг хүргэж байгаа юм.

Хамтлаг дуучдаас хамгийн үнэтэй тоглолт

“Хурд” хамтлагийн “Ханьдаа дуулъя UNPLUGGED баярын цэнгүүн” тоглолт  “Irish Pub”-д  өнөөдөр 19.00 цагаас болно.  Хамтлагуудаас хамгийн үнэтэй тоглолт болж байгаа бөгөөд тасалбарын үнэ 160 000 мянган төгрөгөөр худалдаалагдаж байна. Тэртээх 1993 онд анхлан байгуулагдаж өнөөдрийг хүртэл монголын рок попын ертөнцөд тасралтгүй 20 жилийн турш уран бүтээлээ туурвиж буй "Хурд" хамтлагийнхан тоглолтонд ирсэн бүсгүйчүүддээ “Christian Dior”-н гарын бэлгийг бэлэглэнэ гэсэн шүү.

- Монголын хамгийн чадварлаг хоолойтой охидын хамтлаг болох “Sweetymotion” хамтлаг Тусгаар тогтнолын ордонд эхчүүд, эмэгтэйчүүддээ зориулж  “Male stars and Unplugged” тоглолтоо хийхээр товложээ. Тасалбарын үнэ суудлаасаа хамаарч 30, 50, 70 000 төгрөгөөр худалдаалагдаж байгаа.

-Монголын рок поп урлагт шинэ содон дуугаралт, мэргэжлийн түвшний тоглолтыг үзүүлдэг хамтлагийн тоонд “A Sound” хамтлагийг нэрлэх нь зүй ёсны хэрэг. Тэд өнөөдөр 18:00 цагаас Thai restaurant-д “Woman`s day” тоглолтоо хийх юм. Тоглолтын билет 50 мянган төгрөгний үнэтэй бөгөөд үүнд вино, ундаа, ус, зууш багтсан юм байна. Энэхүү тоглолтоо 100 хүнд зориулан тоглох аж.

-VOICE  "VOICE СОНГОДОГ ҮДЭШ" тоглолтоо  өчигдөр, өнөөдөр тоглох ба  Улсын Филармонийн концертын танхимд  19:00 цагаас болох юм. Тасалбарын үнэ 30 000 төгрөгөөр худалдаалагдаж байна.

-“Нюанс” хамтлаг УДБЭТ-т  мөн л өчигдөр, өнөөдөр хоёр “Бид ээждээ хайртай” тоглолтоо 19.00 цагаас тоглоно. Тасалбарын үнийн хувьд  30 000 төгрөг.

-“Харанга” хамтлагийн бөмбөрчин Н.Пүрэвдаш өнгөрсөн жил “Солонго” охидын жааз хөгжмийн хамтлаг байгуулсан нь урлаг сонирхогчдын зүгээс өндөр үнэлгээ авсан. Монголын анхны мэргэжлийн эмэгтэй саксафонч, жааз уран бүтээлчдийг гаргаж ирэх нь долоон гишүүнтэй “Солонго” хамтлаг өнөөдөр анхны тоглолтоо “River sounds” клубт хийхээр болжээ.

Дуучин, хөтлөгч, жүжигчин Д.Цовоо “Харанга” хамтлагийн гитарчин Ц.Энхманлайтай хамтран бүсгүйдийг баярлуулахаар “Хайрын дуу” нэртэй амплаггед мөн өчигдөр болон өнөөдөр  "Баянгол ресторанд" 19.00 цагт болно. Гуравдахь жилдээ зохион байгуулж буй тоглолтод 1960, 70-аад оны хит дуунууд эгшиглэх юм.

Нийтийн буюу зохиолын дуучдын тоглолт

    -Зохиолын дуучид дундаа хамгийн үнэтэй цэнгүүнийг хийж байгаа нь МУСТА Г.Эрдэнэтунгалаг юм. Тэрээр "Сүүтэй энгэрийн аялгуу" VIP цэнгүүнээ Улаанбаатар ресторанд энэхүү өдөр 19 цагаас хийнэ  Тасалбарын үнэ 88 000 төгрөг.

-МУГЖ С.Жавхлан “Галаа манасан Монгол бүсгүй” тоглолтоо өчигдөр, өнөөдөр  Улаанбаатар паласт  тоглох юм. Тасалбарын үнэ 25 000 төгрөгөөр худалдаанд гарчээ. Тэрээр  “Түмний дуртай дуунууд” хэмээх тоглолтоос хойш дөрвөн жилийн хугацаанд тоглолт хийгээгүй байсан. Энэ удаагийн тоглолт нь бусад дуучдын Мартын 8-нд зориулан тоглох тоглолтоос ихээхэн өвөрмөц ажээ. Учир нь тоглолтын орлогоос 21 аймаг, зургаан дүүргийн хамгийн өндөр настай, өрх толгойлсон ээжүүдэд нэг сая төгрөг тараахаар болжээ.

    -МУГЖ Д.Ширмэнтуяа, Д.Амаржаргал нарын хамтарсан "Мөнхөд дурсагдах ижий" тоглолт Тусгаар тогтнолын ордонд 18.00 цагаас болно. Тасалбарын үнэ 30, 50, 100 мянган төгрөг юм байна. 12 жилийн хугацаанд Монгол орноо нийт 2 удаа тойрч, 60 гаруй бүрэн хэмжээний тоглолтыг, мөн 2002 онд “Хослох зүрхний уянга”, 2006 онд “Чи бидэн хоёр” бүрэн хэмжээний тоглолтоо толилуулж байсан юм.

Нийтийн дуучдын "Үртэй хүн жаргалтай" нэгдсэн тоглолт Монгол бөхийн өргөөнд өчигдөр, өнөөдөр  19 цагаас болох бөгөөд 10 000, 15 000 төгрөгөөр тасалбар нь худалдаалагдаж байна. Гагцхүү билет шаглагчид 20-25000 төгрөг болгож тоглолтын тасалбарыг борлуулж байгааг эх сурвалж мэдээлсэн юм.

-Ардын жүжигчин А.Долгор “Эхийн цагаан суврага” тоглолт энэ өдөр СТӨ-нд  болно. Тасалбарын үнэ 20 000 төгрөг.
Хошин урлаг хийгээд Драма

-УДЭТ-т  өнөөдөр  В.Хюгогийн  "Парисын Дарь эхийн сүм" жүжиг 18.00 цагаас тоглогдоно. Тасалбарын үнэ суудлаасаа хамаараад 15-45 000 төгрөгийн үнэтэй байгаа юм. Дэлхийн олон орны томоохон театрын тайзнаа амилж байсан тус жүжгийг үзэх хүмүүсийн цуваа  Тасалбар борлуулах цэгээс тасрахгүй байгаа гэсэн шүү. Мөн энэ өдөр 18.00 цагт У.Шекспир Гамлет эмгэнэлт драмын жүжиг үзэгчдэд хүрэх юм.

- Тэгвэл “Шинэ үе” продакшны “Шилдэгийн Шилдэг Gold” тоглолт мөн өнөөдөр Монголын хүүхдийн ордонд 17,19, 21-н цагаас болно.  Тасалбарын үнэ 10 000 төгрөг юм.