Зуун мянган айлын орон сууц захиалагчид өчигдрөөс Сүхбаатарын талбай жагсаал хийж эхэлсэн билээ. Жагсаал хийж буй иргэд Засгийн газрын тогтоолоор батлагдсан “100 мянган айлын орон сууц” хөтөлбөрт хамрагдахаар материалаа өгсөн ч зээлийн санхүүжилт нь шийдвэрлэгдээгүй байна. Уг хөтөлбөрийн шаардлагыг бүрэн хангаж, материалаа өгсөн иргэдийн захиалга өгсөн байр нь өнгөрсөн оны 10-12 сарын хооронд ашиглалтанд орсон байна. Гэсэн ч зээлийн санхүүжилт нь шийдэгдээгүйн улмаас барилгын компаниуд энэ оны хоёрдугаар сараас эхлэн алданги тооцож, энэ сарын 15 гэхэд гэрээг нь цуцлахаа албан ёсоор мэдэгджээ. Тиймээс жагсаал цуглаан зохион байгуулж өлсгөлөн зарлахаа мэдэгдээд байгаа юм. Тэд өнөө өглөөнөөс Сүхбаатар дүүргийн Засаг даргаас зөвшөөрлөө аваад яг одоо төв талбай дээр жагсаалаа үргэлжлүүлж байна.

Харин жагсагчидтай МАН-ын Мэдээлэл технологийн газрын дарга Б.Цогтгэрэл очиж уулзжээ. Тэрээр хэлэхдээ “Монгол төрийн удирдлагууд энэ суудалдаа мөнхөрсөн гэж ойлгоогүй байлтай. Төрийн бодлогоо үргэлжлүүлээд явах нь тэдний үүрэг. Ингэж иргэдийг хохироох ёсгүй” гэсэн юм. Мөн МАН-ын гишүүд тэдэнд хүч нэмж, хамтран ажиллах хүсэлтэй байгаагаа илэрхийллээ.