Уул уурхайн сайд, Эдийн засгийн хөгжлийн сайд, Нийслэлийн Засаг даргын хамтарсан тушаалаар байгуулагдсан ажлын хэсгийн гишүүд өнөөдөр Налайхын нүүрсний уурхайд ажиллах юм байна. Тэнд ажиллаж байгаа гар аргаар нүүрс олборлогчидтой уулзаж, санал хүсэлтийг нь сонсох юм байна.Өнгөрсөн сард Налайхын уурхайг хаах саналыг Засгийн газарт оруулсан. Засгийн газраас эхлээд газар дээр нь судалж, дүгнэлт гаргахыг холбогдох яам, агентлагуудад үүрэг болгосон байна. Үүний дагуу Ажлын хэсэг байгуулагдан өнгөрсөн долоо хоногоос Налайхын уурхай дээр ажиллаж эхэлжээ.
Налайхын уурхайд 177 аманд 1500 орчим хүн гар аргаар нүүрс олборлодог гэсэн албан бус судалгаа байдаг. Тэд ойролцоогоор жилд нэг сая орчим тонн нүүрс олборлож, борлуулдаг байна. МХЕГ, Ашигт малтмалын газраас томилогдсон Ажлын хэсгийнхний хэлж байгаагаар нийт амуудын 50 гаруй хувийг лацаджээ. Тус уурхайд өнгөрсөн онд 20 орчим хүн, он гараад хоёр ч хүн амь насаа алдсан юм.
