Өнөөдөр “Олон улсын хэрэглэгчийн эрхийг хамгаалах өдөр” тохиож байна. Энэ өдөр дэлхийн бүх оронд хэрэглэгчийн эрхийн төлөө дуу хоолойгоо нэгтгэдэг. Харин “Манай улсад хэрэглэгчийн эрх ашгийг хамгаалахаасаа илүү зөрчдөг. Монголд хэрэглэгчийн эрх хаагдмал, баталгаагүй байна” гэж иргэд ярьж байна. Хэрэглэгч хаан гэх уриатай үйлчилгээний байгууллагуудын талаар иргэд ямар бодолтой явдаг болон хэрэглэгчийн эрхийг хамгаалах байгууллагуудын ажлыг хэрхэн дүгнэдгийг сонирхлоо.

Иргэн Б.Баярмаа:

    Хүүхдийнхээ идэж байгаа хүнсэнд хамгийн их санаа зовж байна. Баталгаатай газраас хүнсээ авъя гэхээр тэнгэрт тулсан үнэтэй болохоор яах аргагүй захаас, заримдаа гар дээрээс авч байгаа. Ер нь хилээр орж ирж байгаа хүнсэнд л хамгийн их хяналт тавих хэрэгтэй.  Цаас, гялгар уут тэр байтугай өт хүртэл гарлаа л гэдэг. Гэхдээ хэрэглэгчид өөрсдөө бас баталгаат хугацааг нь харж авах ёстой. Ер нь сүүлийн үед юмны үнэ өсөөд байгаа болохоор бага орлоготой хүмүүс  үнэ багатайг нь л сонгодог. Мэргэжлийн хяналтын газар нь болохоор хээл, хахууль авдаг гэж дуулдах юм.  Нэг цайны газрын хоолноос элдэв юм гарч хаагдлаа гэхэд маргааш нь буцаад ажиллах жишээтэй. Юу идэж байгаагаа мэдэхгүй байна гэдэг үнэхээр асуудал. Хэчнээн хэрэглэгч та хаан гэж өргөмжлөөд ч аюулгүй байдал, үнэ дээр анхаарахгүй бол хэрэг алга. ШӨХТГ-аас өөр хэрэглэгчийн эрхийн талаар ярьдаг байгууллага байдаггүй.

Иргэн Я.Нямсүрэн:

 Автобусаар үйлчлүүлэх болгонд миний эрх зөрчигддөг.  Зорчих нөхцөл муу, ариун цэвэр болоод техникийн шаардлага хангадаггүй. Харин супермаркетуудад хэрэглэгчийн хувиар байж чаддаг. Таксины үйлчилгээтун тааруу. Аль болох л илүү үнэ авах гэдэг. Мөн оршин суугчийн хувьд хогны машин ирэхгүй уддагт бухимдах зэргээр хэрэглэгч миний эрх ашиг их хохирдог. Манай улсад хэрэглэгчийн эрхийг хамгаалах байгууллага жинхэнэ утгаараа ажилладаг гэдгийг мэдэхгүй л байна.

Иргэн Э.Халиун:

 Хэрэглэгч миний эрх ашиг байнга зөрчигддөг. Баталгаагүй хоол хүнс, стандарт хангахгүй тээврийн хэрэгсэл, аюулгүй ажиллагаа, харилцааны соёлгүй үйлчилгээний байгууллагуудад үргэлж л сэтгэл дундуур явдаг. Микро автобуснууд гурван хүн суух стандарттай сандал дээр дөрвөн хүн суулгадагт үнэхээр дургүй. Би гадаадад амьдарч байгаад ирсэн.  Миний амьдарч байсан оронд яавал хэрэглэгчийг тавтай тухай байлгах вэ гэдэг дээр маш сайн анхаарч ажилладаг.