Оюутолгойн хөрөнгө оруулалтын гэрээг өөрчлөх ёстой гэсэн гишүүд өмнөх парламентад цөөнх байсан. Тэднийг Б.Бат-Эрдэнэ тэргүүтэй хэдхэн гишүүд бүрдүүлж явсан. Тэгвэл энэ жилээс Оюутолгойн нийт ашгийн 70 гаруй хувийг Монголчууд хүртэнэ гэсэн тэнэгдүү сурталчилгаанаас болж олон хүн бухимдаж эцэстээ энэ орд газрын хөрөнгө оруулалтын гэрээг дахин авч үзэхэд хүргэлээ. Монголчуудыг илт мангар гэж ойлгуулсан уг сурталчилгаа ийм үр дүнг бий болгож байна.

 Тэгээд ч Оюутолгой төлөх ёстой татвараа төлдөггүй, Монголын хуулийг үл тоодог, хөрөнгө оруулалтынхаа хэмжээг дур мэдэн нэмсэн, мөнгөө монголын банкуудад итгэж хадгалуулдаггүй гэх мэт олон мэдээлэл монголчуудыг эгдүүцэхэд хүргээд байгаа. Энэ бүхнээс болсон уу эсвэл ерөнхийлөгч Ц.Элбэгдоржийн байр суурь нөлөөлсөнө үү Оюутолгойн хөрөнгө оруулалтын гэрээнд нэмэлт өөрчлөлт оруулах лобби бүлэг УИХ-д албан бусаар байгуулагдаад удсан гэнэ. Эх сурвалжийн мэдээлж байгаагаар бол энэ бүлэгт бүх намын төлөөлөл багтсан аж. Өөрөөр хэлбэл бүх намын төлөөлөл ижил тэгш багтсан ганц лобби бүлэг аж. Эхлээд С.Ганбаатар, Б.Бат-Эрдэнэ тэргүүтэй гишүүд байсан бол одоо өргөжсөөр 40 хүрсэн гэж эх сурвалж мэдээллээ. Үнэхээр Оюутолгойг өөрчлөх сонирхолтой гишүүдийн тоо парламентын олонхи болсон бол энэ гэрээг авч хэлэлцэх нь гацраагүй юм. Тэгээд ч уул уурхайн сайд д.Ганхуяг Оюутолгойн гэрээг өөрчлөх ам өчиг өгч томилогдсон гэж шуугисан. Энэ бүхэн Оюутолгойн гэрээг өөрчлөх тохироог бүрдүүлээд байгаа бололтой.

Хамгийн гол нь парламентын энэ бүгийн санаачилгыг хөрөнгө оруулагч тал хүлээн авах эсэх нь эргэлзээтэй юм. Учир нь энэ гэрээнд өөрчлөлт оруулах гэсэн аливаа санаачилгыг хөрөнгө оруулагчид таатай хүлээж авдаггүйг бүгд мэднэ. Гэвч С.Баярын үед байгуулсан энэ гэрээнд С.Батболдын Засгийн газар багахан ашигтай заалтуудыг оруулсан. Тэгээд ч тухайн үед энэ гэрээнд нэмэлт өөрчлөлт оруулахыг гишүүд төдийлөн дэмжээгүй. Харин одоо Н.Алтанхуягийн Засгийн газар ямархуу заалтууд оруулахыг урьдчилан хэлэх боломжгүй юм. Ямартай ч гэсэн парламент дахь санал өгөх хүч бэлэн болсон байна. Дээр нь төрийн тэргүүн ч нэмэлт өөрчлөлтийг дэмжиж үг дуугарсан. Ард түмэн ч дэмжиж байгаа. Энэ бүхэн хөрөнгө оруулалтын гэрээг дахин авч үзэх, сайжруулах боломжуудыг бий болголоо. Гол нь монголчуудад ямар ашигтай заалтуудыг оруулах вэ гэдгийг л ард түмэн хүлээж байна.

Үүний зэрэгцээ гэрээг гардан гүйцэтгэсэн тухайн үеийн сайд С.Баярцогт одоог хүртэл Оюутолгойн гэрээг маш сайн гэрээ хэмээн зүтгэсээр байгаа юм. Харин түүнтэй хамт гарын үсэг зурсан Д.Зоригт, Л.Гансүх хоёр чимээгүйхэн ажлаа амжуулж явна.