Өнгөрсөн амралтын өдөр болсон МАХН-ын Гүйцэтгэх товчооны хурлаар намын дарга Н.Энхбаярын биеийн байдлын талаар ярилцсан. Уг хурлаар Н.Энхбаярын биеийн байдалд анхаарсангүй хэмээн сайд нартаа хариуцлага тооцно гэснээс болж намын удирдлагууд хоорондоо маргалдаж, Хууль зүйн дэд сайд суудлаасаа огцрох өргөдлөө хүртэл өгсөн гэдэг. Мөн Н.Энхбаярын эхнэр О.Цолмон намын удирдлагуудад хандан захидал илгээæýý.

Уг захидалд Н.Энхбаярыг ялаас чөлөөлүүлэх ажлыг хурдан хөөцөлдөөч гэсэн байв. Гэвч уг захиа Гүйцэтгэх товчооны хурлаас хоёр хоногийн дараа олон нийтэд ил болж, хэвлэлээр цацагдсан юм. Иймд О.Цолмон ихэд эгдүүцэж, “Захидлыг намынхандаа өгсөн болохоос хэвлэлд өгөөгүй. Захиа яагаад ил болсон юм бэ” хэмээн ихэд бухимдсан талаар эх сурвалж мэдээлж байгаа. Тиймээс МАХН-ынханд захидлыг ил гаргасан хүнийг олж өгөхийг хүсчээ. Намын удирдлагууд ч мөн О.Цолмонг хэл ам хийсэн учраас захидлыг ил гаргаж, Гүйцэтгэх товчооны хурлаар яригдсан зүйлүүдийг олон нийтэд мэдээлсэн хүнийг хайж байгаа юм байна.

Энэ мэтчилэн болоод буй бүх нөхцөл байдлын талаар МАХН-ны ерөнхий нарийн бичгийн дарга Г.Шийлэгдамба ярилаа. Тэрээр  “МАХН-ны дотоод амьдрал хэвийн байгаа. Сүүлийн гүйцэтгэх товчооны хурлаар намын даргын биеийн байдалтай холбогдуулан тодорхой асуудал ярилцах үед гишүүдийн хувьд маргаан үүсэх уур амьсгал бий болсон. Гэхдээ энэ бол зарчмын үүсэх ёстой уур амьсгал байсан. Э.Эрдэнэжамъяан сайд өөрийн байр сууриа илэрхийлэхдээ “Огцрох өргөдлөө өгмөөр байна. Намынхаа ажилд идэвхтэй оролцмоор байна” гээд өргөдөл бичсэн тухайгаа ярьсан.

 Би хурал даргалагчийн хувьд дэд сайдын асуудлыг гүйцэтгэх товчооны хуралдаанаар шийдэх боломжгүй юм гэдгийг илэрхийлсэн. О.Цолмонгийн тавьсан ил захидалд Гүйцэтгэх товчоо хүндэтгэлтэй хандаж, цаашдаа үйл ажиллагаандаа анхаарах ёстой асуудал гэж үзсэн. Зарим хүний буруу ойлгоод байгаа шиг албан тушаалын, хариуцлага тооцохын тухай хөндөөгүй юм. Би намын дарга Н.Энхбаяртайгаа байнга очиж уулздаг. Биеийн байдал нь маш муу байгаа” гэжээ.