Казахын ард түмний үндэсний баяр Наурыз энэ өдрүүдэд тохиож байна. Наурызын баярыг угтаж Баян-Өлгий аймаг төдийгүй Улаанбаатар хотод томоохон арга хэмжээнүүд зохиогдож буй юм. Казахын ард түмний хаврын тэргүүн сарын баяр болох Наурыз манай Цагаан сартай олон талаараа төстэй. Ирж яваа урин цагийн баяр учраас хүн бүхэн Наурызыг ихэд бэлэгшээн угтдаг.

Бүрэн бус судалгаа, тооцоогоор Улаанбаатар хотод Баян-Өлгий аймгийн гаралтай арван мянга орчим казах, тува, дөрвөд, урианхай иргэд амьдардаг байна. Тэдний түрүүч нь Улаанбаатар хотод 1940-1950-иад оны үед ирж суурьшсан байдаг. Тэр цагаас хойш тэдний үр сад, үр хүүхэд бүгд нийслэлд ажиллаж, амьдарч, Монгол Улсын хөгжил, бүтээн байгуулалтад өөрсдийн хувь нэмрээ оруулж ирсэн түүхтэй юм.

Сонирхуулахад, Улаанбаатар хот дахь хамгийн өндөр настай Казах иргэдийн судалгааг өнгөрсөн жил гаргаж байсан. Казах иргэдийн дундаас хамгийн өндөр настай нь Монгол Улсын хөдөлмөрийн баатар, Ардын эмч Ж.Хайрулла юм. Ер нь казахууд Наурызын баяраар ахмад буурлууддаа хүндэтгэл үзүүлдэг.  Тиймээс ахмадууддаа хүндэтгэл үзүүлэх арга хэмжээг хоёр жилийн өмнөөс тогтмол зохион байгуулж байгаа.

Тэгвэл өнөөдөр 15.30 цагт Тусгаар тогтнолын ордны их танхимд “Наурыз-2013”  Казах иргэдэд зориулсан хүндэтгэлийн концерт үнэ төлбөргүй болох юм. Тоглолтод МУГЖ С.Батсүх, Г.Батбаяр, П.Ширмэнтуяа, Л.Чаминчулуун, СТА Л.Нурбулан, Н.Алтантүлхүүр болон Мөрөөдлийн театрын жүжигчид оролцохоор болжээ. Уг хүндэтгэлийн тоглолтонд МАН-ын дарга Ө.Энхтүвшин мэндчилгээ дэвшүүлнэ. Түүнчлэн Монгол бөхийн өргөөнд Наурезийн өдөрт зориулсан 256 бөхийн барилдаан болж байна.