Удтал харьд чимээгүй байсан С.Баяр сүүлийн үед илт идэвхижих боллоо. Тэрбээр олон нийтийн сошиал сүлжээнд орж бага ч гэсэн твиттерээр жиргэж эхлэв. Бас ярилцлага өгч олны өмнө байр сууриа илэрхийллээ. Энэ бүх идэвхижил нь түүнийг ирэх ерөнхийлөгчийн сонгуульд нэр дэвших нь гэсэн харыг улам ихээр төрүүлж байгаа юм.

    Удтал харьд чимээгүй байсан С.Баяр сүүлийн үед илт идэвхжих боллоо. Тэрбээр олон нийтийн сошиал сүлжээнд орж бага ч гэсэн твиттерээр жиргэж эхлэв. Бас ярилцлага өгч олны өмнө байр сууриа илэрхийллээ. Энэ бүх идэвхжил нь түүнийг ирэх ерөнхийлөгчийн сонгуульд нэр дэвших нь гэсэн харыг улам ихээр төрүүлж байгаа юм. Гэвч тэрээр өмнө “Өөрийгөө ерөнхийлөгч болох одонд төрөөгүй гэдгээ сайн мэднэ” хэмээн мэдэгдэж байсан бол энэ удаа ч гэсэн жирийн сонгогчийн үүднээс сонгуульд оролцож сонгох эрхээ эдэлнэ гэдгээ мэдэгдлээ. Гэвч хүмүүс хардах эрхээ эдэлсээр байна. Түүнийг сонгуулийн нэр дэвшигчид тодорсны дараа л хэлсэндээ хүрч нэрээ дэвшүүлсэнгүй гэж үзэхээс өөр аргагүй.

    Харин тэрбээр өөрийг нь тойрсон олон асуудалд бага ч гэсэн хариу өглөө. Түүнийг гадаадад цагаачлах хүсэлт гаргасан, залуухан бүсгүйтэй сууж үрийн зулай үнэрлэсэн, докторын зэрэг хамгаалахаар судалгаа хийж эхэлсэн гээд багагүй л  бичсэн. Энэ бүхэнд тэрбээр хариу барьжээ. Хэзээ ч цагаачлах хүсэлт гаргаж байгаагүй. Насаа бодсон ч, хашиж байсан алба ажлаа бодсон ч гэсэн тийм юм хийхгүй гэдэг ам тангарагаа ард түмэндээ өглөө. Докторын ажил хийж байгаа гэдэг нь бас л худлаа аж. Харин үрийн зулай үнэрлэсэн нь үнэн аж. Гэвч хэдэн насны бүсгүйтэй сууж үртэй болсон нь нэг хэсэгтээ нууц хэвээрээ үлдлээ. 

    C.Баяр олны анхаарлын төвд байгаа цөөнгүй асуудлаар байр сууриа илэрхийлэв. Тэр дундаа авлигын асуудлаар нэлээд сонирхолтой байдлаар санал бодлоо илэрхийлсэн нь олон хүний амны зугаа болж байна. Тэрбээр "Төр засгийн авлигатай тэмцэх ажлыг хуулийн дагуу явуулж байгаа бол дэмжинэ. Харин “яг одоо авлигатай тэмцээд байна уу, Ардын Намтай онцолж тэмцээд байна уу гэх эргэлзээ нийгэмд төрөхөөр байна. Нөгөө л  намчирхсан, дайсагнасан хандлагаар энэ ажил явбал үр дүн гарахгүй. Харин ч алсын уршигтай байж мэднэ. Цаг цагаараа байдаггүй, цахилдаг хөхөөрөө байдаггүй юмаа гээд намчирхсан өргөн хонзогнол үүсч тархвал Монголын нийгэмд энэ нь сайныг авчрахгүй нь ойлгомжтой” хэмээн тайлбарлажээ. Түүний цаг цагаараа байдаггүй, цахилдаг хөхөөрөө байдаггүй гэдэг гэсэн санаа юуг илэрхийлнэ вэ? Хэнд хандаж хэлээ вэ? Бас ямар санааг илэрхийлэх гээ вэ? Үнэхээр Монгол Ардын Намтай онцолж тэмцээд байгаа юу? Одоогийн байдал бол бараг л тийм л байгаа гэж хэн хүнгүй л ярьж байгаа. Харин С.Баяр энэ бүхэн хариутай шүү гэдгийг ил далдаар хэлсэн бололтой. Энэ санаагаа батлахын тулд “1996 онд “Ардчилсан холбоо” эвсэл сонгуульд ялаад МАХН-ын харьяалалтай баахан хүмүүсийг ажлаас нь халсан. 2000 онд МАХН ялаад хариуг нь давуулж барьсан гэдэг. Түүнээс хойш сонгуулийн дараа намын харьяаллаасаа болж ард иргэд хэдэн мянгаараа ажилгүй болдог явдал хэвшил, ёс заншил шахуу болчихлоо. Энэ буруу бусармаг хэвшил авлигатай тэмцэх ажилд халдвал яана?” хэмээн асуух сануулахын хооронд тайлбар хийжээ. 

    Үндсэндээ МАН-ын гол лидер АН-ын авлигатай тэмцэх аяныханд сануулга өгчээ. За бараг л та бүхэнд ч гэсэн ээлж ирнэ шүү гэсэн санаа энэ ярианаас нь цухуйж байна хэмээн тайлбарлаж болох л юм. Юутай ч гэсэн мөнхийн эрх мэдэлтэйгээ байх юм шиг аархаад байгаа Ардчилсан засгийнхан дунд ч асуудалтай нөхдүүд олон бийг ард түмэн хэлэлцдэг. Тэр бүхэн дараагийн удаа ээлжээ хүлээж авлигалын эсрэг дайны эрэг шургуулганд хавчуулагдан явж мэдэх юм. Эсвэл МАН засгийн эрхэнд гарвал өнөөдрийнхөөс ч илүүтэйгээр авлигалтай тэмцэж ардчилсан намыханд хариу барьж мэдэх юм. С.Баярын хэлдэгээр одоогийн эрх баригчид алсын уршигтай аргаар авлигатай тэмцээд байгааг ч үгүйсгэх аргагүй. Н.Энхбаяр ч бас С.Баяртай агаар нэг “Юм эргэхдээ эргэнэ” гэж хэлснийг энд дурдахгүй өнгөрч болохгүй.

    Ийнхүү хоёр том намын бие, биеэ намнах гэсэн аргачлал авлигын асуудлаар бамбай хийж ил далд олон хэлбэрээр өрнөж улам л хүрээгээ тэлж байж мэдэх юм.