ШШГЕГ-ын харьяа хорих 461 дүгээр ангид хоригдож байсан “Дижитал” хамтлагийн ахлагч асан Баавар өнгөрсөн бямба гаригт хорих ангийн камерт шатаж, түлэгдэн эмнэлэгт хүргэгдсэн хэрэг гарсан. Хэргийн талаар ШШГЕГ болон Баавар өөр өөр тайлбар хийж буй.
     ШШГЕГ-ын харьяа хорих 461 дүгээр ангид хоригдож байсан “Дижитал” хамтлагийн ахлагч асан Баавар өнгөрсөн бямба гарагт хорих ангийн камерт шатаж, түлэгдэн эмнэлэгт хүргэгдсэн хэрэг гарсан. Хэргийн талаар ШШГЕГ болон Баавар өөр өөр тайлбар хийж буй. Тодруулбал, ШШГЕГ “Баавар өөрийгөө шатаахыг завдсан” хэмээн мэдэгдсэн бол Баавар “Цахилгааны гэмтлээс гарсан галаас болж, өнөөдөр би ийм байдалтай байна” хэмээн мэдэгдээд байгаа юм. Ингээд Бааварын талаар холбогдох хүмүүсээс тодрууллаа.


Бааварын ээж Н.Оргодол “Биеийн байдал нь муу. Хоёр хоног ухаангүй байсан. Өчигдрөөс эхлэн гуурсаар шингэн юм ууж байна. Хар нүүрс шиг юмаар бөөлжөөд байгаа. Унталтын байдалтай л байна. Яагаад миний хүүг шатаах болсныг ойлгохгүй байна. Хүүг маань амиа хорлохоор ийм алхам хийсэн хэмээн хэвлэлээр бичиж байна. Миний хүү амиа хорлох хүн биш. Миний дөрөв дэх хүүхэд. Өөрөө ажил төрөлтэй. Эхнэр хоёр хүүхдийн хамт амьдардаг. Яагаад ийм ташаа мэдээлэл гаргаж байгааг ойлгохгүй байна” гэлээ.


Бааварын эгч  Ш.Уранчимэг “Хэвлэлээр дүүг маань өөрийгөө шатаасан хэмээн бичээд байна. Дүү маань өөрийгөө шатаах хүн биш. Өнөөдөр миний дүү “Эгчээ миний байдал ийм байна. Би ийм хэрэг хийх хүн мөн үү” гээд уйлж байна. Миний дүү амьдралтай, ажилтай хүн. Хорих 461 дүгээр ангийнханд үнэхээр гомдож байна. 15-20 минутын турш амь тэмцэн орилж байхад албан хаагчид нь туслаагүйд үнэхээр гайхаж бас гомдож байна. Дүү маань өчигдрөөс хоёр хөл дээрээ зогсож, өөрөө бие засаж байна. Энэ хэргийг үнэн зөвөөр тогтооно гэдэгт найдаж байна. Би дүүгээ сэтгэлийн тэнхээтэй байж өвчнөө ялан дийл гэж хэлсэн. Хэн шатаасан гэдгийг эмнэлгийн байгууллага шийдэхгүй. Цагдаагийн байгууллага тогтооно гэж эмнэлгийн зүгээс тайлбарласан” гэв.


Ингээд түүний өмгөөлөгч Л.Баттогтохоос зарим зүйлийг тодруулав.

-Хэргийн талаар тодруулахгүй юу. ШШГЕГ-аас “Баавар өөрийгөө шатаахыг завдсан” хэмээн мэдэгдээд байгаа?

-ШШГЕГ-ын буруутай үйл ажиллагаанаас болж, өнгөрсөн бямба гарагт хорих 461 дүгээр ангид хоригдож байсан Баавар шатаж түлэгдсэн хэрэг гарсан. Гэтэл ШШГЕГ-аас өөрийгөө шатаахыг завдсан гэх ташаа мэдээлэл цацаад байна.

-Хэзээ цагдан хоригдсон юм бэ?

-Энэ сарын 5-нд болох байсан шүүх хуралд тэрээр хоцорч ирсэн. Эрүүгийн байцаан шийтгэх хуульд заасан нөхцөл байдал үүссэн учраас цагдан хорьсон. Тэгээд хурлыг энэ сарын 25-нд буюу өчигдөр зарлаад байсан юм.

-Дараагийн хурлыг хэзээ товлосон бэ?

-Ирэх сарын 12-нд болно.

-Түүнийг ял эдлэхээс зугатаж амиа хорлохыг завдсан гэх?

-Бааварын хувьд Эрүүгийн тухай хуулийн 192.1-д зааснаар мансууруулах буюу сэтгэцэд нөлөөлөх эм, бэлдмэл, бодисыг борлуулах зорилгогүйгээр хууль бусаар бэлтгэсэн, олж авсан, хадгалсан гэсэн үндэслэлээр шалгагдаж байгаа. Хэрэв гэм буруутай нь тогтоогдвол хөдөлмөрийн хөлсний доод хэмжээг нэг зуугаас нэг зуун тавь дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл хоёр жил хүртэл хугацаагаар хорих ялаар шийтгүүлэх юм. Гэтэл хэвлэлээр түүнийг 10-15 жилийн хорих ялаар шийтгүүлнэ гэж бичээд байна. Тэрээр сэтгэл зүйн бэлтгэлтэй байсан. Тэгэхээр амиа хорлох хүн биш. Тэгээд ч хорих төв рүү ороход нүх сүвийг бүгдийг шалгадаг. Өчигдөр шүүх хурал хойшлоод би “Мөнгөн гүүр” эмнэлэгт очиход Ш.Батбаярын өрөөний гадаа хоёр хянагч байсан. Тэр хянагч нар миний бүх зүйлийг хурааж авсан. Тэгэхээр тэнд ямар нэгэн биет авч явах ямар ч нөхцөл байхгүй.

-Биеийн байдал нь одоо ямархуу байна?

-Ер нь маш муу байна. Зөвхөн гадна талдаа түлэгдсэн биш амьсгалын эрхтэн түлэгдсэн. Хажууд нь суухад өмхий үнэртэж байгаа.

-Хорих ангийн өрөө бүр камертай. Камерийг шалгаж үзсэн үү?

-Тухайн үед камер ажиллагаагүй байсан гэсэн. Эцсийн байдалд энэ бүхнийг шалгаж тогтооно. Баянгол дүүргийн цагдаагийн хэлтэст шалгаж байна. Шийдвэр гүйцэтгэлийн тухай хуульд зааснаар гав бороохой хэрэглэх журам байдаг. Монголд хорих ангид саатуулагдсан хүн галд шатсан анхны тохиолдол боллоо.

-Яагаад сахилгад орсон юм бол?

-Бааварын ярьснаар өнгөрсөн бямба гарагт цагдан хоригдсон хүмүүсийг зургаа зургаагаар нь усанд оруулсан. Тэрний хоёр дахь ээлжинд Батбаяр явж байсан. Гурав дахь ээлжийн зургаан этгээдийн нэг нөхөр бидэнтэй усанд ордоггүй гэж хэрүүл өдсөн гэсэн. Тэгээд Баавар амиа хамгаалсан юм билээ. Гэтэл долоон харгалзагч ирээд Бааварын гарыг гавалж, хөлийг нь дөнгөлсөн байсан.

-Галын дохиолол байдаг. 20 минут галд түлэгдэж байхад хуягууд мэдээгүй байна гэдэг сонин юм?

-Гал хэдэн минутад авалцахыг шинжээчид тогтооно. Хэдий хугацаанд шаталт явагдсан нь дүгнэлтээр гарна. Мэргэжлийн байгууллага тогтоох ёстой.

-Хоригдлуудаас гэрчийн мэдүүлэг авах уу?

-Хуулийн байгууллага шалгаж байна.


Мөн түүний хар тамхины хэрэгт өмгөөлөгчөөр ажиллаж буй Д.Ганбатаас дараах зүйлийг тодрууллаа.

-Та Бааварын хэрэгт хэзээнээс ажиллаж байгаа вэ?

-Ш.Батбаяртай би сүүлийн нэг жил хамтарч ажиллаж байна. Хүний төлөө сэтгэлтэй, жаахан сагсуу тийм л эр хүн.

-Таныг гал гарсан хэргийн газарт очсон гэсэн?

-Гал гарснаас хойш өрөөнд шатаж болох бүх юм шатсан байсныг эх сурвалж хэлсэн. Харин тэр дундаас яаж амьд үлдсэнийг гайхаж байна. Ар гэрийнхэнд нь баяр хүргэмээр байна. Ор, хана, төмөр бүгд улайссан байсан. Ийм нөхцөл байдалд гал хэдэн мөчид яаж авалцах вэ гэдгийг шинжээчид тогтооно. Эцэст нь бидэнд бодит үнэн л хэрэгтэй. Сахилгын арга хэмжээ авсан үед илүү хяналт тавих ёстой байсан. Өндөржүүлсэн бэлэн байдалд харах ёстой. Тэр хүмүүс үүргээ биелүүлж, цаг хугацаа хожсон бол өдийд ийм хохирол учрахгүй байсан. Түүнийг шүүх хурал хэрэг гардаг өдрийн маргааш болох байсан.


    Өмгөөлөгч болон ар гэрийнхэн зүгээс ийм тайлбар хийв. Тиймээс ШШГЕГ-ын харьяа цагдан хорих 461 дүгээр ангийн дэд дарга Б.Өлзийбатаас хэргийн талаар тодрууллаа.

    -Бааварыг 15-20 минут шатаж байхад танай байгууллагын ажилчид ямар ч тусламж үзүүлээгүй гэж байна?

    -Галын дохиолол дуугарангуут л хорих ангийн харуул, хамгаалалтын бүрэлдэхүүн нэг минут ч хүрэхгүй хугацаанд очиж тусламж үзүүлсэн. Хэрэв 10-15 минут очоогүй, тусламж үзүүлээгүй бол тусгаарлах өрөө нь өөртөө гэмтэл учруулах боломжгүйгээр хийсэн зөөлөн материалтай  байсан учраас хүн амьд гарах боломжгүй байсан.

    -Баавар галыг цахилгааны гэмтлээс болж үүссэн гээд байгаа?

    -Шинжээчдийн дүгнэлт эцэслэн гараагүй байна. Тэгээд ч тусгаарлах өрөөнд цахилгаанаас үүдэлтэй гал гарах боломжгүй гэж бид үзэж байгаа. Гэрэл, цахилгаан, техник талаасаа бүрэн  хамгаалалттай, урьдчилан сэргийлсэн өрөө. Сэжигтнийг тусгаарласан өрөөнд паар ч юм уу өөрийн биедээ хор  хөнөөл хүргэчих эд зүйл байхгүй зориулалтын өрөө.

    -Тэгвэл хоригдож буй сэжигтэн ямарваа нэгэн мэс биедээ авдаггүй биз дээ?

    -Тийм. Гэхдээ түүнийг холбогдох байгууллагууд тогтоох байх. Ер нь Бааварыг гал гаргах хэрэгсэл авч орсон байж болзошгүй гэж сэжиглэж байгаа.

-Ер нь камерийн бичлэгийг дэлгэж болох уу?

-Байгууллагын дотоод журмаараа хориотой.