МИАТ ХК-ийн Берлин-Москва-Улаанбаатар чиглэлийн ОМ136 нислэг Москва хотын Шереметьево олон улсын нисэх буудалд саатаснаас хойш гурав хонож байна. Тэгвэл МИАТ компаниас нислэг нь саатсан 120 зоригчийг авчрахаар өчигдөр "Боинг" онгоц  нисгэжээ. Уг онгоц БНАСУ-ын нийслэл Сеүл хотод 6.30 цагт буугаад 7.30 цагийн үед Москва руу гарсан байна. Тиймээс Шереметьево нисэх буудалд саатаад байсан 120 зорчигч өнөөдөр 10.00 цагийн үед  Улаанбаатарт, Буянт-Ухаа нисэх буудалд буухаар болжээ.

   Энэ саатлыг онгоцны дугуй хагарснаас болсон гэж МИАТ компаниас мэдэгдээд байгаа бөгөөд онгоцны нөөц дугуй явуулсан ч тэр нь ОХУ-ын хил дээр саатаад байгаа юм. Харин ОМ136 онгоц яагаад нөөц дугуйгүй явж байсан бэ гэдэг асуулт учир мэдэх хүмүүсийн анхаарлыг татаж байна. Аюулгүй байдлын үүднээс нисгэгчид нөөц дугуй авч явдагийг энэ салбарт ажилладаг хүн бүр мэднэ. Тиймээс яагаад нөөц дугуйгүй явж байсан бэ гэдгийг зарим  эх сурвалжууд шалгаж эхлэхээр болжээ.

   Шереметьевод саатсан хүмүүсээс бизнес ангиллынхаас бусад нь энэ өдрүүдэд нисэх буудлын “Duty free” дэлгүүрийн гадаа унтаж, МИАТ компаниас ямар нэгэн тусламж авч чадахгүй байгаа хэмээн бухимдаж байсан. Хохирсон иргэд ШӨХТГ-т эрхээ хамгаалуулах хүсэлтээ хүргүүлж,  ШӨХТГ ч хүлээж авсан байна. Тиймээс О.Магнай дарга удахгүй нөөц дугуйны гэх хэргийг шалгаж эхлэх бололтой.

    Оны өмнөхөн мөн л ОХУ-ын Шереметьево нисэх буудалд МИАТ-ын ОM136 онгоцоор Улаанбаатар хотод ирэх байсан 15 зорчигч саатсан. Оюутнуудыг даац хэтэрсэн гэсэн шалтгаанаар саатуулсан гэж мэдээлж байлаа. Тэнд Берлин хот болон бусад олон орноос ирсэн 15 оюутан байсан бөгөөд бусад зорчигчдыг суулгаад зөвхөн оюутнуудыг ялгаж үлдээсэн гэж зорчигчид мэдээлж байсан. МИАТ-ын төлөөлөгч Энхтүвшин тэдэнд "Монголд цаг агаар муу байгаа тул та нарыг суулгахгүй" гэсэн ч дараа нь "Нисэх онгоцны даац хэтэрсэн. Та нар хөнгөлттэй билеттэй учраас түр хүлээж бай" гэжээ. Харин тэдгээр оюутнууд зарим нь л хөнгөлөлттэй тасалбартай байсан аж. Оюутнууд өөрсдийнх нь суудлыг зарах гэлээ гэж хэл ам гаргахад "Та нарын суудал хоосон байгаа" гээд онгоцонд суулгаагүй байна. Энэ явдалд МИАТ-ынхан уучлалт гуйгаад л өнгөрсөн.

   Дарга нар нь мөнгө угаасан, авлигын хэрэгт холбогдсон МИАТ компанийн үйл ажиллагааг шалгахад багагүй зөрчил ил болж магадгүй нь. Ямартаа ч эхний ээлжинд 120 зоригчийг саатуулсан онгоц яагаад нөөц дугуйгүй явж байсан тухай бид эргэн сурвалжилж мэдээлэх болно.