“Гэгээн Муза” наадмын үеэр ССАЖЯ-ны сайд С.Оюунгэрэлийн сэтгэгдлийг нь сонссоноо хүргэе.

-“Гэгээн Муза” наадмын тухай сэтгэгдлээсээ хуваалцахгүй юу?

-Маш сайхан байна. Бүх уран бүтээлчиддээ театрын баярын өдрийн мэндийг хүргэе.

-Шагнал авсан хүмүүсийн талаар та юу хэлэх вэ. Та ямар бүтээл дэмжив? 

-"Би Эдит Паиф байна” жүжгийг тоглоход нь үзсэн. Үзээд уйлсан. Үзсэний дараа ч санаанаас ер гарахгүй байсан. Надад маш их хүчтэй нөлөөлж чадсан. Миний сэтгэлд маш их хүчтэй нөлөөлсөн учраас жүжигчин Ц.Баясгаланг “Би Эдит Пайф байна” хэмээх дүрээрээ шагнал авах байх гэж бодсон. Гэтэл түүнээс илүү хүчтэй өрсөлдөгч байж. Ер нь манай жүжигчид ширүүн өрсөлдлөө. Харин Гран при шагналыг “Гамлет” жүжиг авах болов уу гэж тааж байсан. Гэтэл “Эсрэг дурлал” жүжиг авчихлаа. “Эсрэг дурлал” жүжгийн хувьд 100 жилийн өмнө зохиол нь бичигдсэн. Гэтэл Японд ч тавиагүй байгаа зохиолыг бид жүжиг болгон тавьснаараа онцлогтой. Энэ нь өөрөө их хүч хөдөлмөр, зориг тэвчээр шаардсан ажил юм. Тиймээс ч шүүгчид тус жүжгийг Гран при шагналд өргөмжилсөн болов уу гэж бодож байна.

-Зохиол бичдэг хүний хувьд драмын жүжиг бичье гэсэн бодол байдаг уу?

-Би “Отор цагаан” гэдэг нэртэй бэсрэг жүжиг 2011 онд бичиж байсан. Тэр жүжгийг маань радио жүжиг болгоод радиогоор цацсан. Одоо радиогийн Алтан фондод байгаа. Хааяа тэр жүжгээ радиогийн алтан фондоос сонсдог юм. Тайзан дээр хэн ч тавиагүй. Хүний эрх, эмэгтэй хүний эрхийн төлөө бичсэн жүжиг юм. Тиймээс ч тэр жүжиг маань эмэгтэйчүүдийн төлөө үйл ажиллагаа явуулдаг байгууллагад өмчлөгддөг. Надад өмчлөгддөгүй.

-Дараа жилийн “Гэгээн Муза” наадмыг үүнээс илүү сайн зохион байгуулахын тулд ССАЖ-ын яамнаас яаж оролцох вэ?

-Соёлын яамнаас шийдвэр гаргахад нь оролцдоггүй. Шүүгчдийг сонгох, шалгаруулалт явуулах нь урлагийнханы шийдэх ёстой асуудал. Яамны зүгээс уламжлал болгосон шагналаа л олгодог. Энэ наадам нь нэр хүндтэй брэнд арга хэмжээ юм. Ялангуяа ийм брэнд арга хэмжээнд Соёлын яам, дэмжлэг үзүүлэх бололцоотой. Санхүүгийн тал дээр дэмжлэг үзүүлнэ. Харин шийдвэр гаргахад нь өчүүхэн ч оролцохгүй. Цаашид ч  төрөөс хараат явж байх ёстой гэж бодож байна.