Бааварын шатсан асуудалд таван өөр тайлбар хийж буй ШШГЕГ-аас өнөөдөр албан ёсны мэдээлэл өглөө. Энэ үеэр ШШГЕГ-ын дэд дарга П.Хосбаяраас зарим зүйлийг тодрууллаа.
    Бааварын шатсан асуудалд таван өөр тайлбар хийж буй ШШГЕГ-аас өнөөдөр албан ёсны мэдээлэл өглөө. Энэ үеэр ШШГЕГ-ын дэд дарга П.Хосбаяраас зарим зүйлийг тодрууллаа.

-Гал яг юунаас гарсан юм бэ?

-Гал гарсан шалтгаан нөхцөл, гарсан галыг унтраахаар хэрхэн ажилласныг тогтоохоор мэргэжлийн болон хуулийн байгууллагууд ажиллаж байгаа ч эцсийн дүгнэлт гараагүй байна. Эцсийн дүгнэлт гартал мэдээлэл өгөхгүй.

-Баавар өөрөө галыг гадны нөлөөтэй гээд байгаа?

-Мэргэжлийн байгууллагын дүгнэлт гараагүй, хэрэг бүртгэх мөрдөн байцаах ажиллагаа дуусаагүй байхад энэ талаар тодорхой мэдээлэл өгөх боломжгүй байна. Тухайн үед болсон явдлыг бичигдсэн бүхий л бичлэгийг битүүмжлээд дүрэм журмынх нь дагуу шалгаж байгаа.

-Камерийн асуудалд танайхаас таван өөр төрлийн тайлбар өгч байна?

-Өөр өөрийн төсөөллөөр тайлбар өгсөн юм шиг байна.

-Камерийн бичлэгийг хэр удаан хадгалдаг вэ?

-Нэг сар хадгалдаг.

-Бааварт гав, дөнгө хэрэглэсэн байсан гэсэн. Өмгөөлөгчид нь үүнийг эсэргүүцэж байгаа?

-Хуулиараа тусгай хэрэгсэл хэрэглэх эрхтэй. Энэ бол хуулийн хүрээнд хийгдсэн зүйл.

-Хорих 461 дүгээр ангийн удирдлагуудад хариуцлага тооцсон гэсэн. Энэ тухайд?

-Тийм. Хоригдлуудын цаашдын аюулгүй байдлын баталгааг хангах хуулиар хүлээсэн үүргийнхээ үүднээс ШШГЕГ-ын даргын тушаалаар ажлын хэсэг байгуулан ажиллаж, тодорхой шийдвэрийг гаргасан байгаа. Тодруулбал, хорих 461 дүгээр ангийн зарим алба хаагчид ШШГЕГ-ын даргын удаа дараа өгсөн албан даалгавар, үүрэг чиглэлийг биелүүлээгүйн улмаас дээрх нөхцөл байдалд хүрсэн хэмээн ангийн дэд дарга тэргүүтэй хэд хэдэн албан хаагчийг ажлаас албан ёсоор чөлөөлсөн.

-Яг ямар хариуцлага тооцсон бэ?

-Цагдан хорих 461 дүгээр ангийн дарга дарга, дэд хурандаа Ц.Очгэрэлийг сургалтад сууж байсан хэдий ч нөхцөл байдлыг биечлэн очиж үзээгүй, хяналт тавиагүй гэх үндэслэлээр үндсэн цалинг гурван сарын турш 20 хүртэлх хувиар бууруулсан. Мөн цагдан хорих ангийн дэд дарга Д.Өлзийбат, ахлах төлөөлөгч Э.Тамир нарыг гарсан хэрэгт зөв дүгнэлт хийгээгүй гэж ажлаас нь халсан.

-Зөвхөн доод албан тушаалтнууд ч биш, ШШГЕГ-ын удирдлагууд ч хариуцлага хүлээх ёстой байх?

-Мэдээж ШШГЕГ-ын удирдлагуудалд хариуцлагын асуудал яригдвал татгалзах зүйлгүй. Гэхдээ ингэснээр асуудал шийдэгдэхгүй.