Ийм олон асуудлыг Монгол хүн бүр мэдэхийг хүсч байна. Харин тэр хүнийг ганцхан ерөнхий сайд Н.Алтанхуяг мэдэж байна.

    Засгийн газрын тэргүүн Н.Алтанхуяг юм юманд барьц алдаж явна. Түшиж тулах сайн баггүй хүн ингэдэгийг тэрээр яруу тодоор харуулах боллоо. Түүнд ажлын сайн баг гэж алга. Мэдлэг боловсрол, олон түмэнтэй харьцах чадвар нь ч сул юм. Бас намынхан нь түшиг болохоосоо илүү төсөл, тендер ярьж зовоодог бололтой. Дээр нь хол замд хамтарсан МАХН-МҮАН-ынхан үе, үе шантаажилж, ханилгаагүй зан гаргадгийг ард түмэн мэдрэх болсон. Ийм замыг тэр өөрөө л сонгосон. Одоо яая гэхэв. С.Баярын хэлдэгээр “харамсал” төрүүлж байна.

Ийм зовлонд шаналсан Засгийн газрын тэргүүн сүүлийн үед анхаарал татсан олон ноцтой асуудлуудыг “нуулгүй үнэнээ хэлье гэж байгаад” ярьж эхэллээ. Түүнийг зовлондоо шаналаад “халуурсан” гэж бодохгүй байна. Юуны өмнө тэрээр сэтгүүлчидтэй уулзахдаа “Орос бензиний үнээ өсгөлөө л гэдэг. Үнэн хэрэгтээ үнээ өсгөсөн юм байхгүй л байгаа байхгүй юу. Яасан бэ гэхээр эндээс манайхан давхиж очоод үнээ өсгөчих гэж оросуудыг гуйгаад явж байна шүү дээ. Тэгээд эргэж ирээд “Оросууд бензинийхээ үнийг нэмчихлээ гэж ярьдаг. Эндээс хүн томилоод судлаад үзэхээр нэмээгүй  л байдаг байхгүй юу” гэж тэр ярилаа. 

Энэ юу болж байна ард түмээн! Засгийн газар энд бензиний үнийг нэмэгдүүлэхгүйн тулд өдөр бүр хэрүүл хийж, төсвөөсөө ихээхэн хэмжээний мөнгийг нефтийн компаниудад өгч байна. Энэ мөнгө иргэн бүрийн татвараас боссон. Ард түмэн энд бензиний үнэ нэмэгдчих вий гэж өдөр бүр түгшүүртэй шахуу амьдарч байна.

Ийм байхад ОХУ-д оччихоод бензиний үнийг нэмээд өгөөч гээд гуйгаад явж байдаг хэн бэ тэр. Ард түмнийхээ энэ зовлонтой байдлаар хэн ингэж тохуурхдаг байна вэ. Ард түмний халаасан дахь тав гурван төгрөгийг хууль бусаар хуу хамж, үнийн хөөрөгдөлд эх орноо түлхэж байгаа тэр хэн бэ. Ард түмний халаасан дахь мөнгийг ОХУ-д өгөх гэж зүтгэсэн тэр хүнийг эх оронч гэж хэлэх үү. Тэр хүнд ямар сонирхол, эрх ашиг байна вэ. Тэр хэнд үйлчилж байна вэ. Лав л Монгол хүний төлөө биш гэдэг нь үг, үйлдлээс нь харагдаж байна. Тэр хэн бэ? Эсвэл аль компани вэ? Эх орныхоо хувь заяагаар, ард түмнийхээ амьжиргаагаар ингэж тохуурхах эрүүл үзэгдэл мөн үү? Ийм олон асуудлыг Монгол хүн бүр мэдэхийг хүсч байна. Харин тэр хүнийг ганцхан ерөнхий сайд Н.Алтанхуяг мэдэж байна.

Тэр ийм үйл явдал болсныг, мэдэж байгаа гэдгээ олон түмний өмнө зарласан. Тиймээс ард түмэн ерөнхий сайдаас энэ хүний нэрийг хэлэхийг шаардах бүрэн эрхтэй. Хэрэв хэлж чадахгүй бол ерөнхий сайд таныг ч гэсэн хэний талд байна вэ гэдэгт эргэлзэх хүмүүсийн тоо нэмэгдэх болно.  

    Ерөнхий сайд Н.Алтанхуяг хэлсэн үгэндээ эзэн болох ёстой. Тэгэх л гэж улсыг удирдаж төрийг тэргүүлэх болсон. Ийм эх оронч бус хүмүүсийг ард түмэн мэдэж байх нь зүйтэй. Бас эх орон ард түмнийхээ эсрэг ийм өөдгүй, увайгүй юм ярьж явдаг этгээдийг тагнуул, цагдаагийнхан шалгах нь зүйтэй. Бас нөгөөх шударга бус явдлыг хязгаарладаг ШБӨХТГ-ынхан ч гэсэн овоо хараандаа авах хэрэгтэй. Бодвол ерөнхий сайд тэр эрхмийг, тийм үйлдэл хийгээд явж байгааг эдгээр агентлагууддаа мэдэгдсэн гэдэгт итгэж байна.

Одоо харин ард түмэндээ нэрийг нь ил тодоор зарлах хэрэгтэй. Хэрэв хэлэхгүй хаацайлаад өнгөрвөл, улс төр болгоод булзааруулбал эрхэм ерөнхий сайд маань та ард түмнээ хуурсан, худал мэдээлэл түгээж өөрийгөө өрөвдүүлэх гэсэн болж хувирна. Тиймээс нийт үндэстнийхээ эсрэг зогсож, бензиний үнийг нэмээд өгөөч ээ гээд өөр улсаас гуйгаад явж байсан этгээдийг ард түмэндээ хэлэх цаг ирлээ. Үүнийг ард түмэн мэдэхийг хүсч байна.