“Дайны эрсдлийн мөнгө” гэгчийг бий болгож, МИАТ-аас их хэмжээний мөнгө угаасан хэрэгт "Монголиан Эйрлайнес" компанийн эзэн Ч.Хоролсүрэн, түүний төрсөн дүү Ч.Суурьтогтох, Н.Гантөмөр, МИАТ ХК-ийн гүйцэтгэх захирлын албан тушаалыг хашиж байсан гавьяат нисгэгч Р.Бат-Эрдэнэ, Б.Эрдэнэбилэг, Ц.Орхон болон түүний эхнэр Ү.Цэцэгмаа, Төрийн өмчийн хороонд ажиллаж байсан С.Батхишиг, МИАТ-ын захирал асан Б.Эрдэнэбилэгийн төрсөн дүү Б.Мандахбаяр нарын есөн хүн холбогдоод байгаа юм.

    Тэдний араас МИАТ-ийн одоогийн захирал Г.Жаргалсайхан шалгагдахаар болжээ. Учир нь МИАТ-ийн Бодлого, хэрэгжилтийн хэлтсийн дарга С.Билэгсайхан түүнийг албан тушаалаа урвуулан ашигласан хэрэгт УМБГ-ын Эдийн засгийн гэмт хэрэгтэй тэмцэх хэлтэст шалгуулахаар өгсөн юм. Тодруулбал, Зам тээврийн яамны Төрийн нарийн бичгийн дарга Б.Батзаяагийн тус компанид илгээсэн албан бичгийг олон нийтэд дэлгэсэн билээ.

    Үүнд, “МИАТ-ийн Баянхонгор аймгийн “Нүхт-тур” ХХК-тай байгуулсан их хэмжээний мөнгөний гэрээг цуцлах, МИАТ компанид учирсан хохирлыг хууль хяналтын байгууллагад хандаж нэхэмжлэх, гэрээ байгуулсан үйл ажиллагаа нь МИАТ-ийн холбогдох албан тушаалтнууд эрх мэдлээ хэтрүүлсэн гэмт хэргийн шинжтэй байгааг шалгуулах арга хэмжээг авах”-ыг даалгасан албан бичиг  байсан юм.

    Б.Жаргалсайхан захирлын 2011 онд хийсэн гэрээн дотор ердийн суудлыг  100 сая төгрөгөөр, бизнес класс суудлыг 220 сая төгрөгөөр худалдан авсан нь ч тогтоогджээ.
Гэтэл зах зээлийн ханшаар  нэг сандлын  дээд үнэ нь  10-20 мянган ам.доллар аж. Энэ талаар С.Билэгсайхан “Б.Жаргалсайхан захирал энэхүү гэрээнд андуурч гарын үсэг зурсан” гэж мэлзсэн гэсэн юм.

    Харин өөрийн удирдлагаа шүүмжилсэн С.Билэгсайханыг хүмүүс дагаж, ойр дотныхон хүмүүс учир битүүлгээр хоолонд хордох болжээ. Энэ талаар С.Билэгсайхан “Өчигдөр намайг хар ногоон өнгийн 4476 УБХ дугаартай машин дагасан. Ойр дотны хүмүүс маань ч хоолны хордлогод ороод байна” гэв. Тиймээс энэ тухай тэрээр хуулийн байгууллагад хандаад байгаа юм байна.