Ерөнхий сайд Н.Алтанхуяг ууланд авирах дуртай нэгэн. Тэрээр өнгөрсөн бямба гаригийн Засгийн газрын хуралдааны дараа Бурхан Халдун уулыг зорин нийслэлээс хөдөлжээ. Гэвч гэнэтийн их цасан шуурганы улмаас Ерөнхий сайд болон дагалдан яваа хүмүүсийнхээ хамтаар машинтайгаа цасанд боогдсон байна. Энэ тухай мэдээлэл авснаар Засгийн газрын автобаазаас таван автомашин гарган Ерөнхий сайдын байгаа газар руу яаралтай явууллаа гэсэн мэдээлэл байна.
Баттай эх сурвалжийн мэдээлснээр Ерөнхий сайд Н.Алтанхуягийг аврахаар тусгай албаныхан өчигдөр хөдөлсөн ч одоог хүртэл олоогүй байгаа аж. 

Энэ талаар Нийслэлийн онцгой байдлын газраас тодруулахад ОБЕГ-ынхан мэднэ гэлээ. ОБЕГ-ын дарга Т.Дуламдоржтой утсаар холбогдоход “Хэнтий аймгийн Онцгой байдлын газрынхантай холбоо барьж байна. Тодорхой мэдээлэл авсны дараа хариу өгье” гэсэн юм.

 Ерөнхий сайд нь дагалдан яваа  хүмүүсийнхээ хамт 30 гаруй цаг цасанд боогдон гацчихаад байхад холбогдох албаныхан нь ийн хариу хэлж сууна.