Ерөнхий сайд Н.Алтанхуяг өнгөрсөн бямба гаригт Засгийн газрын хуралдааны дараа Бурхан халдун уулыг зорьсон байна. Түүнтэй хамт  70 гаруй хүн явжээ.

Аялалын баг Хэнтий аймгийн төвд хоноглоод, өглөө нь  Бурхан халдун уулыг зорьжээ.

 Гэтэл орой 20 цагийн үед ууланд авирсан Ерөнхий сайд түүний гэр бүл, хүүхдүүд, бие хамгаалагч, хэвлэл мэдээллийн албаны зураглаач, сэтгүүлч нийлсэн 20-иод хүн сураг тасарсан байна.
 Ерөнхий сайдтай Засгийн газрын Хэрэг эрхлэх газрын дарга Ч.Сайханбилэг хамт яваа сурагтай. Тэдэнтэй явсан бусад хүмүүс нь уулын бэлд үлдсэн байгаа мэдээ байна. Урд шөнө 22 цагийн үед Төрийн ордонд Улсын Онцгой байдлын комисс яаравчлан хуралдаж, аврах үйл ажиллагааны тактикаа боловсруулан, Монгол Улсын шадар сайд Д.Тэрбишдагваар ахлуулсан баг газар дээр очихоор шөнө дунд хөдөлсөн байна.
Улмаар Эрүүл мэндийн сайдын зөвлөл шуурхай хуралдаж, эмнэлэгийн тусламж үзүүлэх шаардлагатай тоног төхөөрөмж бүхий явуулын хэд хэдэн автомашин бүхий эмч нарыг шөнөдөө илгээсэн мэдээ байна. Харин энэ шуурхай ажиллагааг төвөөс удирдах үүрэг Хууль зүйн сайд Х.Тэмүүжинд ноогдсон гэнэ.  Энэ талаар  тодруулахаар Шадар сайд Д.Тэрбишдагватай утсаар холбогдох гэсэн боловч утсаа салгасан байна. Бурхан халдун уулын орчим цасан шуургатай, уулын оройд хүйтний эрч чанга байгааг нутгийн иргэд хэлжээ. Мөн Багануурын эмнэлэг өндөржүүлсэн бэлэн байдалтай ажиллаж байгаа аж.

  Харин энэ талаар Засгийн газрын ХМА-ны дарга Ц.Мөнхтөр “Ерөнхий сайдыг  хайхаар нисдэг тэрэг явсан. Удахгүй ирэх байх” гэсэн юм.