ИЗНН-ын Үндэсний хорооны ээлжит хурал өнгөрсөн баасан гарагт болж өнгөрчээ. Тус нам өнгөрсөн сонгуульд “Амьдрал” хөтөлбөрийг дэвшүүлэн оролцсон. Хэдийгээр хангалттай суудал авч чадаагүй ч намынхаа рейтингээр парламентад хоёр суудал авч, Засгийн газрын бүрэлдэхүүнд орж чадсан. Үүний үр дүнд “Амьдрал” хөтөлбөрөөсөө бодлого шинэчлэлийн агуулга бүхий 40-өөд зүйлийг Засгийн газрын мөрийн хөтөлбөрт тусгуулж чадсан байна.

Байгаль орчны яамыг дэлхийн нийтийн хандлагад нийцүүлэн улс орны хөгжил нь ногоон бодлогод тулгуурлан байж тогтвортой хөгжинө гэсэн үзлийн үүднээс үндсэн чиг үүргийн Байгаль орчин, ногоон хөгжлийн яам болгон өөрчлөн ажиллаж байгааг гишүүд нь сайшаасан байна. Түүнээс гадна намын дэд дарга, Ерөнхий нарийн бичгийн дарга нарт итгэл үзүүлэх эсэхийг авч хэлэлцжээ.

Намын дотоод ажил хариуцсан дэд дарга Х.Бат-Ялалтыг өөрийнх нь хүсэлтээр чөлөөлж, оронд нь Соёл, спорт, аялал жуулчлалын сайд М.Түмэнжаргалыг олонхийн саналаар сонгосон байна. Тэгвэл Ерөнхий нарийн бичгийн дарга С.Жаргалыг үүрэгт ажлаас нь чөлөөлсөн байна.