Мэргэжлийн хяналтын ерөнхий газар, ШӨХТГ, НОБГ хамтран нийт 85 обьектод шалгалт хийжээ. Шалгалтаар олон хүний амь нас, эд хөрөнгөнд ихээхэн хэмжээний хохирол учирч болзошгүй нийт 20 аж ахуйн нэгж, байгууллагын үйл ажиллагааг зогсоожээ.
    Эдгээр байгууллагын үндсэн хөрөнгө, тоног төхөөрөмжийг ашиглахыг хэсэгчлэн буюу бүрмөсөн зогсоох арга хэмжээ аваад байгаа юм.
Үүнд "Метро полис" караоке баар, "Эргэн дурсахуй" диско баар, нүхэн гарц доторх "Вальют" арилжааны цэг, “Тумбааш” худалдааны төв, “Барс Импекс” ХХК-ийн "Барс-1" худалдааны төв, Сохо ХХК-ийн Гүүрэн байгууламж үйлчилгээний төв, "Дурсамж" караоке баар, “Амрита” диско клуб, “Соёмбо” сүлжээ кино театр, Баянзүрх бөөний худалдааны төв, "Санлей" плаза худалдааны төвийн зүүн жигүүрийн хэсэг, "Мишээл Экспо" Групп ХХК-ийн Үзэсгэлэнгийн танхим зэрэг газрын үйл ажиллагааг  зогсоогоод байна. Эл байгууллагууд сүүлийн 4-5 жил дараалан явуулсан хяналт шалгалтаар гал түймрийн улсын хяналтын байцаагчийн өгсөн заавал биелүүлэх албан шаардлага, мэдэгдэлд заагдсан зөрчлүүдийг арилгах талаар тодорхой ажил төлөвлөж зохион байгуулаагүй, галын аюулгүй байдлыг хангаагүй тул үйл ажиллагааг нь зогсоох хүртэл арга хэмжээ авчээ.
Ингэснээр олон хүний амь нас, эд хөрөнгөнд ихээхэн хэмжээний хохирол учирч болзошгүй аюулаас сэргийлж байгаа гэж НОБГ-аас мэдэгдлээ.