Нийслэлийн Онцгой байдлын газраас өнөөдөр хэвлэлийн хурал хийлээ.

НОБГ-аас дөнгөж сая мэдээлэл хийлээ. Энэ сарын байдлаар улсын хэмжээнд нийт  1064 удаагийн гал түймэр гарч, 5.2 тэрбум төгрөгийн хохирол учирч, гал түймэрт 31 хүн өртөн нас баржээ.  Мөн 16 хүн түлэгдэн гэмтсэн байна. Онцгой байдлын албаны гал сөнөөгчид 354 хүний амь бие, төр байгууллага, аж ахуйн нэгж, иргэдийн 11.3 тэрбум төгрөгийн өмч хөрөнгийг гал түймрийн аюулаас авран хамгаалаад байгаа аж. Обьектод гарсан гал түймрийг өнгөрсөн оны мөн үетэй харьцуулахад гал түймрийн тоо 12.3 хувь, гал түймрийн улмаас учирсан хохирлын хэмжээ 88.5 хувиар тус тус өссөн байна. Гал түймрийн тоо буурахгүй байгаа нь нэг талаараа хүн амын механик өсөлт, хот хүрээгээ тэлж байгаатай холбоотой юм.
Сонирхуулахад, Статистик үзүүлэлтээр үзэхэд Улаанбаатар  2009 онд 1.196.797 хүн амтай  байсан бол 2012 онд 1.318.150 хүн амтай болж гурав хүрэхгүй жилд 122 мянга буюу  нэг аймгийн хүн амтай тэнцэх хэмжээгээр нэмэгдсэн байна.

    Онцгой байдлын албаны албан хаагчид энэ жилд хэдийгээр 354 хүний амь нас аварч чадсан ч эрдэнэт хүний амь нас эрсдсэн, гал түймэрт гэр бүлээрээ өртсөн эмгэнэлт явдал сүүлийн үед гарсаар байгаа.
Тухайлбал, энэ сард Нийслэлийн сонгино хайрхан дүүргийн 21 дүгээр хорооны задгайд иргэн Э-н  таван ханатай гэр шатаж, гурван том хүн, 0-5 насны гурван хүүхэд нас баржээ.
Мөн Дархан-Уул аймагт иргэн Б-гийн байшин шатаж, нэг том хүн, хоёр хүүхэд нас барсан.
Нийслэлд төдийгүй орон нутагт галын аюулаас болж эд  хөрөнгөөрөө хохирч буй өчнөөн тохиолдол байгаа юм.

    НОБГ-аас сүүлийн хоёр сарын хугацаанд байгууллага, аж, ахуйн нэгжид тавих хяналтыг сайжруулах зорилгоор Монгол Улсын Шадар сайдын тушаалаар “Хүн олноор цуглардаг үзвэр үйлчилгээ, худалдаа, баар цэнгээний газруудад гамшгаас хамгаалах болон гал түймрийн улсын хяналтын төлөвлөгөөт бус шалгалт явуулах” удирдамжийг батлуулан шалгалтыг хоёр үе шаттайгаар төв, орон нутагт зохион байгуулан ажиллажээ.
Уг шалгалтыг Мэргэжлийн хяналтын ерөнхий газар, ШӨХТГ-тай хамтран зохион байгуулсан байна. Нийт 85 обьект хамрагдаж, гал түймрийн хэрэг зөрчилд хүргэж болзошгүй 276 зөрчил дутагдлыг илрүүлжээ. Галын аюулгүй байдлын тухай хуулийн зургадугаар зүйлийн 6.1.4, Гал түймрийн улсын хяналтын дүрмийн аравдугаар  зүйлийн 10-ын заалтыг үндэслэн шалгажээ. Шалгалтаар гал түймэр гарах аюултай нөхцөл бий болсон, гарсан тохиолдолд хохирол багатайгаар унтраах бололцоог бүрэн хангаагүй, иргэд үйлчлүүлэгч нарын аюулгүй байдлыг хангаагүйн улмаас олон хүний амь нас, эд хөрөнгөнд ихээхэн хэмжээний хохирол учирч болзошгүй нийт 20 аж ахуйн нэгж, байгууллагын үйл ажиллагаа явуулах, үндсэн хөрөнгө, тоног төхөөрөмжийг ашиглахыг хэсэгчлэн буюу бүрмөсөн зогсоох арга хэмжээ аваад байгаа аж.

    Эдгээр байгууллагын үндсэн хөрөнгө, тоног төхөөрөмжийг ашиглахыг хэсэгчлэн буюу бүрмөсөн зогсоох арга хэмжээ аваад байгаа юм.
Үүнд "Метро полис" караоке баар, "Эргэн дурсахуй" диско баар, нүхэн гарц доторх "Вальют" арилжааны цэг, “Тумбааш” худалдааны төв, “Барс Импекс” ХХК-ийн "Барс-1" худалдааны төв, Сохо ХХК-ийн Гүүрэн байгууламж үйлчилгээний төв, "Дурсамж" караоке баар, “Амрита” диско клуб, “Соёмбо” сүлжээ кино театр, Баянзүрх бөөний худалдааны төв, "Сандей" плаза худалдааны төвийн зүүн жигүүрийн хэсэг, "Мишээл Экспо" Групп ХХК-ийн Үзэсгэлэнгийн танхим зэрэг газрын үйл ажиллагааг  зогсоогоод байна. Эл байгууллагууд сүүлийн 4-5 жил дараалан явуулсан хяналт шалгалтаар гал түймрийн улсын хяналтын байцаагчийн өгсөн заавал биелүүлэх албан шаардлага, мэдэгдэлд заагдсан зөрчлүүдийг арилгах талаар тодорхой ажил төлөвлөж зохион байгуулаагүй, галын аюулгүй байдлыг хангаагүй тул үйл ажиллагааг нь зогсоох хүртэл арга хэмжээ авчээ.
Ингэснээр олон хүний амь нас, эд хөрөнгөнд ихээхэн хэмжээний хохирол учирч болзошгүй аюулаас сэргийлж байгаа гэж НОБГ-аас мэдэгдлээ.

   
    НОБГ-аас залуучуудын үйлчлүүлдэг караоке баар, үйлчилгээний газруудыг галын хамгаалалт хийгээгүйн улмаас хаагаад байгаа. Тэгвэл хаагдсан 20 газрын долоо нь одоогоор зөрчил дутагдлаа арилгаж үйл ажиллагаандаа оржээ. Энэ долоон газар чухам ямар газар байсныг НОБГ-аас нууцалж, мэдээлэл өгөөгүй юм. Мөн “Улаанбаатар Палас”-ыг хаах байсан ч тоглолтын билет нь урьдчилан зарагдсан учир шууд хааж чадалгүй байсаар өнөөдөр хааж байгаа юм байна.  Тиймээс өнөөдрөөс Улаанбаатар Паласын ХХК-ний үзвэрийн танхим ажиллахгүй юм. Тэд хэдийд зөрчил дутагдлаа бүрэн арилга тэр үед нээх шийдвэр гарчээ. Мөн НОБГ-ын шалгалтаар 19 субьектыг 2.760.000 төгрөгөөр торгож, захиргааны арга хэмжээ авчээ.

    Шалгалтын эцсийн дүнгээс үзэхэд шалгалтад хамрагдсан олон хүн төвлөрсөн үзвэр үйлчилгээ, худалдааны байгууллагуудын 75 хувь нь хулгай, гадны гэмт халдлагаас сэргийлж бэлэн байдлыг хамгаалсан мөн зөвхөн ашиг, орлогоо нэмэхдээ анхаарч барилгын давхруудад байрлах лангуунуудын тоог нэмж, зам гарц нарийсган бараа материал байрлуулсан боловч Монгол Улсын гамшгаас хамгаалах тухай болон Галын аюулгүй байдлын тухай хууль, түүнтэй нийцүүлэн гаргасан эрх зүйн актуудыг ноцтойгоор зөрчсөн байжээ.  35 хувь нь галын аюулгүй байдлыг хангуулах дүрэм, нормын шаардлагыг хангаагүй, олон хүний амь нас, эд хөрөнгө гал түймэрт өртөх нөхцөл бүрдсэн, галын аюулгүй байдлыг хангаж ажиллаагүй байжээ. Шалгалт явуулснаар илрүүлсэн 461 зөрчлийн 238 буюу 50 хувийг арилгуулж ажиллажээ.
Одоогоор иргэдээс манай газрын нээж өгөөч гэсэн хүсэлт их ирж байгаа аж. Гэхдээ НОБГ-аас “Бид бүх зөрчлийг арилгасны дараа нээнэ.  Удаа дараа сануулга өгч байсан ч зөрлөө арилгахгүй байсан. Маш олон хүний амь нас, эд хөрөнгөтэй холбоотой асуудал яригдаж байгаа шүү дээ” гэв.