Мэргэжлийн хяналтын ерөнхий газар, ШӨХТГ, НОБГ хамтран нийт 85 обьектод шалгалт хийсэн. Шалгалтаар олон хүний амь нас, эд хөрөнгөнд ихээхэн хэмжээний хохирол учирч болзошгүй нийт 20 аж ахуйн нэгж, байгууллагын үйл ажиллагааг зогсоосон талаар мэдээлсэн. Тэгвэл тэдгээр компаниас долоон газрыг НОБГ-аас мэдээлэх боломжгүй гэж байсан. Учир нь хэвлэлийн хурлаас өмнө тэдгээр газар галын аюулгүй байдлаа хангаж, зөрчлөө арилгасан гэнэ. Тэгвэл тэдгээр долоон газар нь чухам ямар газар байсныг эх сурвалж мэдээллээ.  “Өргөө-1” кино театр, “Бродвэй” ресторан, Улаанбаатар төмөр замын ресторан,  “Энигма” төвийн Чингисийн цогцолборын барилга , “Blue Sky”-ийн зоорийн давхар, Улаанбаатар их дэлгүүрийн 305 дугаар павилон, Драгон худалдааны төвийн ресторан зэрэг аж, ахуй нэгж гаргасан зөрчлүүдээ арилгаж үйл ажиллагаа хэвийн явуулах болжээ. Мөн барилгын зөвшөөрөлгүй компаниуд шалгалтын явцад илэрчээ. Өөрөөр хэлбэл улсын комисс хүлээж аваагүй барилга байгууламж байжээ. Тухайлбал, "Бөмбөгөр", "Тумбааш" худалдааны төвийг Улсын комисс албан ёсоор ашиглалтанд өгөөгүй байсан аж.