“Дайны эрсдэл”-ийн мөнгө гэгчийг бий болгож, ихээхэн мөнгө угаасан хэрэгт МИАТ-ийн хуучин удирдлагуудыг шалгаж байгаа. Тодруулбал, "Монголиан Эйрлайнес" компанийн эзэн Ч.Хоролсүрэн, түүний төрсөн дүү Ч.Суурьтогтох, Н.Гантөмөр, МИАТ ХК-ийн гүйцэтгэх захирлын албан тушаалыг хашиж байсан гавьяат нисгэгч Р.Бат-Эрдэнэ, Б.Эрдэнэбилэг, Ц.Орхон болон түүний эхнэр Ү.Цэцэгмаа, Төрийн өмчийн хороонд ажиллаж байсан С.Батхишиг, МИАТ-ын захирал асан Б.Эрдэнэбилэгийн төрсөн дүү Б.Мандахбаяр, “Голомт” банкны салбарын захирал нарын хүмүүс шалгагдаж байгаа билээ.

 Харин одоогийн байдлаар Ц.Орхоны эхнэр Ү.Цэцэгмаа нарын гурван хүн батлан даалтад гараад байгаа юм. Энэ талаар өнөөдөр Ц.Орхоны өмгөөлөгч Ц.Монгол мэдээлэл хийлээ.

Ц.Орхон МИАТ-ийн захирлаар томилогдсоныхоо дараа “Дайны эрсдэл”-ийн даатгалын болон “МИАТ” ХК-ийн урьд нь мөрдөж байсан бүх гэрээ хэлэлцээрүүдийг ажлын хэсэг томилон шалгуулсан. Мөн гэрээнд заасан нөхцөлийнх нь дагуу гурван сарын өмнө мэдэгдэл өгч, хариу өгөхгүй болохоор нь шууд цуцлаж, “МИАТ”-т дөрвөн тэрбум төгрөгийг үлдээж, далд гэмт хэргийг таслан зогсоож, гэрээг сунгах саналыг хүлээн аваагүй. Тэгээд гэрээг цуцлах ажиллагааг хуулийн дагуу явуулсан. Тиймээс энэ хэргийг гэмт хэрэг гэж үзэх үндэслэлгүй учир хэргийг нь хэрэгсэхгүй болгох ёстой хэмээн Ц.Орхон өмгөөлөгч онцолсон юм.

Мөн Ц.Орхоны хэргийг МИАТ-ийн гэх тодотголтой хэргээс салгаж, хэргийг нь хэрэгсэхгүй болгох хүсэлтийг АТГ-т хүргүүлжээ. Ү.Цэцэгмаагийн хувьд 2002 онд нээлгэд огт ашиглаагүй байсан дансны асуудлаар шалгагдаж байгаа аж.