Африкийн Нигер улсад нөхрийнхөө дарамтад байж улмаар хоёр охиын хамтаар зугтан гарч ирсэн Монгол улсын иргэн С.Энхмаа өнгөрөгч амралтын өдөр хүүхдүүдийнхээ хамтаар эх орондоо ирсэн. Тэрээр гэрээсээ зугтаж сүмд хоёр сарын хугацаанд амьдарч өөрийнхөө болон хоёр охиныхоо бичиг баримтын асуудлыг цэгцэлсэн гэдэг. Харин youtube сайтад тавигдсан бичлэгт С.Энхмаа "Монгол улсыг төлөөлж Египт улсад суугаа Монгол улсын элчин сайдын яаманд хандахад туслаагүй болон мөнгөгүй" гэж хэлсэн байсан. Энэ талаар ГХЯ-ны Консулын газрын дарга Ш.Сүхбаатараас тодрууллаа.

- С.Энхмаагийн хувьд шууд эх орондоо ирэхэд хэцүү байсан. Учир нь нөхөр нь бүх бичиг баримтыг хураачихсан байсан. Бичиг баримтгүй учраас хилээр гарах боломжгүй. Гэтэл С.Энхмаад болон бага охинд нь гадаад паспорт олгоход сүмийнхэн тусалсан. Тэд С.Энхмаад нэрийн данс нээж байгууллага болон хүмүүсээс хандив авсан.  Мөн ГХЯ иргэддээ тусалдаг сангаасаа мөнгө өгсөн. Ингээд С.Энхмаа бүсгүй хоёр хүүхдийнхээ хамт сайн яваад ирлээ.

- Египт дэх Монголын элчин сайд С.Энхмаа бүсгүйд ер туслаагүй гэсэн мэдээл байгаа. Энэ талаар?

- Телевизээр сөрөг мэдээлэл гарсан. Ер нь энэ талаар С.Энхмаа ч өөрөө мэдээгүй. Бичлэгийг тэгэж цацсан нь байрлуулж байсан сүмийнхэнд нь ашигтай байсан байх. Ингэх нь гадны иргэдээс хөрөнгө мөнгө цуглуулахад ашигтай байсан байх. Түүнээс ГХЯ иргэнээ асарч анхаараагүйгээс болоогүй.

- С.Энхмаад манайд улсаас хэдэн төгрөгийн тусламж үзүүлсэн бэ?

С.Энхмаад сүмийнхэн хандив цуглуулж долоон мянган ам.долларын тусламж өгсөн. Харин С.Энхмааг сүмд очсоний дараагаар бидний зүгээс ч тодорхой хэмжээгээр тусалсан. С.Энхмаагийн нөхрийн зүгээс ч таатай хандаагүй. Сүмийн гадна ирж С.Энхмааг гаргаж авах гэж оролдож байсан. Сүмд сар гаруй хугацаанд амьдрахдаа хоол хүнснээс эхлээд Монгол руу ирэх зардалд сангаас гурван сая төгрөгийн зардал гаргасан. С.Энхмаа хоёр хүүхдийн хамт эх орондоо ирсэндээ баяртай байгаагаа илэрхийлээд хүнд хэцүү үед тусалсан бүх хүмүүст баярлалаа гэсэн. Манайхан эх орноо гээд хүнд хэцүү амьдрал туулаад ирсэн хүмүүстээ хатуу үг хэлдэг. С.Энхмаа нөхөртэйгээ сайн сайхан харилцаатай байж байгаад үерхэж нөхөрлөөд явсан байдаг. Гадны хүнтэй суусандаа биш юм. Монголчууд ч хоорондоо суугаад салдаг. Монгол эрэгтэйчүүд ч эхнэрээ зоддог. Энэ нь хүний амьдрал байж л байдаг. Тиймээс харьд зовж шаналж байсан бүсгүйчүүдээ битгий муу муухайгаар нь дуудаачээ. Харин тэрний оронд буяны гараа сунгаж, сэтгэлийн урмын сайхан үг өгөөчээ гэж хэлмээр байна.