Монгол Улсын Ерөнхийлөгчид өнөөдөр АОХН-ийн Сайд нарын долдугаар бага хурлын үйл ажиллагаанд оролцож байгаа Киргиз, Норвеги улсын Гадаад хэргийн сайд нар бараалхав.
Бүгд найрамдах Киргиз улсын Гадаад хэргийн сайд Эрлан Абдылдаевын хувьд 2001-2005 онд Киргиз улсаас Монгол Улсад суух Онц бөгөөд Бүрэн эрхт Элчин сайдаар ажиллаж байсан, Монголыг сайн мэдэх хүн юм. Мөн Монгол Улсын Ерөнхийлөгч өнгөрсөн хоёрдугаар сард Өмнөд Судан дахь энхийг сахиулагчдаа эргэх замдаа Бишкект түр саатах үеэр Киргизийн Гадаад хэргийн сайд Эрлан Абдылдаев угтаж үдэж байсан, эртний танилуудын ёсоор уулзалт эхэллээ.
Монгол Улсын Ерөнхийлөгч, Киргизийн Гадаад хэргийн сайд нарын уулзалтын үеэр Монгол Улсад хэрэгжиж эхлээд байгаа шүүхийн шинэтгэлийн асуудал, хэлэлцэж байгаад түр хойшлуулсан Ашигт малтмалын багц хуулийн төслийн талаар болон Европын аюулгүй байдал, хамтын ажиллагааны байгууллагын хүрээнд хийж буй ажлуудын талаар санал солилцов.
 
Монголын ардчиллын туршлагыг Киргиз улс судалж үлгэр жишээ болгодгийг Киргиз улсын Гадаад хэргийн сайд Эрлан Абдылдаев тэмдэглэж байлаа. Монгол бол Төв Азид ардчиллаар тэргүүлэгч орон тул тийнхүү туршлагыг нь судалдаг гэдгээ хэлж байв. Уулзалтын үеэр Киргизийн Ерөнхийлөгч А.Атанбаевыг тохиромжтой үедээ Монгол Улсад айлчлахыг Монгол Улсын Ерөнхийлөгч урьж, түүнд мэндчилгээ дамжууллаа.
 Норвегийн Гадаад хэргийн сайд Эспен Барт Эйдэ Монгол Улсын Ерөнхийлөгчид бараалхах үеэр хоёр улсын уламжлалт найрсаг харилцаа улам гүнзгийрч байгааг онцоллоо. Энэ онд Монгол Улс, Норвегийн хооронд дипломат харилцаа тогтоосны 45 жилийн ой тохиож байгаа юм.
 
Уул уурхай, ногоон хөгжил, соёл, аялал жуулчлал зэрэг салбарт хоёр тал хамтран ажиллах боломжтой талаар мөн ярилцлаа. Уулзалтын үеэр Монгол Улсын Ерөнхийлөгч Ц.Элбэгдорж, Норвегийн Гадаад хэргийн сайд Эспен Барт Эйдэ нар олон улс, бүс нутгийн асуудлаар санал солилцов.