МАХН-ын дарга Н.Энхбаяр хоол ундаа сойж улмаар биеийн байдал нь эрс муудаж ухаан алдсан. Түүнийг эмчлэх нэмэлт баг гарсан ч Н.Энхбаярын биеийг дээрдүүлнэ гэдэгтээ итгэл муутай байгаа гэж эх сурвалж мэдээлэв. Ардчилсан орнуудын хамтын нийгэмлэгийн сайд нарын долдугаар бага хурлын үеэр МАХН-ын дарга Н.Энхбаяр өлсгөлөн зарлах төлөвлөгөөтэй байсан гэдэг. Гэхдээ Засгийн газрын хэрэг эрхлэх газрын дарга Ч.Сайханбилэг Н.Энхбаяртай биечлэн уулзаж, эрүүл мэндээ бодохыг зөвлөж, өлсгөлөн зарлахгүй байхыг хүссэн гэсэн мэдээлэл ч байгаа.  Харин Н.Энхбаяр “Үнэхээр шударга ардчиллыг эх орондоо бий болгоё гэж байгаа бол хэлмэгдүүлэлтээ зогсоо.Та нар гадаадынханд муухай харагдахгүйг хичээж байгаа бол би улс орноо бодож бодит байдлыг үнэнээр харуулахыг зорьж байна” хэмээсэн гэдэг. МАХН-ын дарга Н.Энхбаяр  өлсгөлөн зарлахаар олон хоног хоол, ундаа сойж байсан учир бямба гаригт ухаан алдан унаж сэхээнд орсон хэмээн МАХН-ын  ерөнхий нарийн бичгийн даргын зөвлөх З.Батбаяр мэдээлэл өгөөд байгаа.

  Харин Нийслэлийн Прокурорын газраас өөрөө биеэ муутгасэн ямар ч ялтанд ялаас чөлөөлөх хөнгөлөлт эдлүүлэхгүй гэсэн мэдэгдлийг хийгээд байна. Энэ талаар Нийслэлийн Прокурорын орлогч Ц.Батболд ярихдаа “Сүүлийн үед шүүхээр хорих ял шийтгүүлсэн  тодорхой нэр нөлөө бүхий хүмүүсийг өвчний учир ялаас чөлөөлүүлэх гэсэн  сонирхол их байна. Эрүүгийн байцаан шийтгэх хуулийн 333 дугаар зүйл, ХЗДХ-ийн сайд, Эрүүл мэндийн сайдын 2002 оны 313/316 тоот тушаалаар батлагдсан журмын дагуу өвчний учир хугацаанаас өмнө  ял эдлэхээс чөлөөлөх асуудлыг  журамласан. Ялтан  ялаас чөлөөлөх өвчний жагсаалтад  хамаарах өвчнөөр өвчилсөн шинж мэдэгдвэл  хорихын нэгдсэн эмнэлэгт шилжүүлэн  нарийн мэргэжлийн  шинжилгээ хийнэ. Жагсаалтад багтсан өвчнөөр өвдсөн  гэж үзвэл  эмнэлэг хөдөлмөр магадлалын дүгнэлт гаргаж, саналыг холбогдох материалын хамт прокурорт ирүүлнэ. Прокурор саналыг үндэслэлтэй гэж үзвэл шинжээч томилон дүгнэлт гаргуулдаг. Ингээд шинжээчийн дүгнэлтээр өвчний жагсаалтад хамаарна гэж үзвэл шүүхэд  шилжүүлж шийдвэрлүүлдэг  журамтай.  Үүнээс гадна ял шийтгэл эдэлж буй ялтан санаатайгаар эрүүл мэнддээ хохирол учруулсан тохиолдолд өвчний учир ялаас чөлөөлөх журам нь хамаарахгүй гэж заасан. Ялтан өлсгөлөн  зарласны улмаас эрүүл  мэнд нь доройтсон бол ялаас чөлөөлөх журам үйлчлэхгүй” гэж ярилаа.

Ямартай ч Н.Энхбаяр өлсгөлөн зарлаад ямар ч үр дүнд хүрэхгүй бөгөөд түүний биеийн байдалд л улам муугаар нөлөөлөх болно гэдгийг эндээс дүгнэж болох юм.

Н.Энхбаярын ухаан алдсан явдлыг бас өргөдөлийг нь ээлжит шоу гэж олон хүн дүгнэж байгаа. Мөн томоохон хэмжээний нэр хүнд бүхий чуулга уулзалтын үеэр улсаа муухай харагдууллаа гэж дүгнэх хүмүүс ч байна. Харин түүнийг дэмжигчид Монголыг Ардчилсан орон биш дарангуйлагч орон гэдгийг олонд таниулах гэсэн боловч эсрэгээрээ Ардчилсан, хүний эрхийг дээдэлсэн орон гэж хэлүүлэхэд хүргэсэн билээ.