Монгол Улсын Ерөнхийлөгч, Ардчилсан намаас нэр дэвшигч Ц.Элбэгдорж “Нарантуул” зах дээр худалдаа, үйлчилгээ эрхэлдэг иргэдтэй өнөөдөр уулзлаа. Нийслэлийн Засаг дарга Э.Бат-Үүл, Баянзүрх дүүргийн Засаг дарга Д.Пүрэвдаваа нар дагалдан явав.

Монгол Улсын Ерөнхийлөгч хүмүүсийн сонирхсон асуултад хариулт өгч, өөрийн хийж хэрэгжүүлсэн ажлуудаас танилцуулах ялдамд тэдний санал, хүсэлтийг сонслоо.

Худалдаа, үйлчилгээ эрхлэгчид хэлэхдээ “Өмнө нь бид бараг бүх бараагаа урдаас зөөж зардаг байсан бол одоо дотооддоо үйлдвэрлэсэн олон төрлийн бүтээгдэхүүнийг борлуулдаг болсон. Тиймээс манай худалдааны төвийн наймаачдын багагүй хэмжээний мөнгө Монголдоо эргэлдэж, Монгол хүний бизнесийг дэмжиж байгаа” хэмээн хэллээ.
Мөн тэд “Энд олон жил худалдаа хийж байна. Банкнаас зээл авсан олон хүн бий. Зээлийн хүү бага, эргэн төлөгдөх хугацаа урт байж бид ашигтай ажиллана шүү дээ. Дээр нь өвлийн улиралд худалдаа, үйлчилгээ эрхлэхэд тун тав тухгүй, маш хүйтэн байдаг. Үүнээс болоод худалдаагаар амьдарлаа залгуулж буй энэ олон хүний эрүүл мэнд их хохирч байна. Зээлийн асуудлыг зохистойгоор шийдэж, тохилог битүү захтай болгож өгвөл таны мөрийн хөтөлбөрт тусгагдсан бүтээгчдээ дэмжих бодлого нэгэн зүйлээр ч болов хэрэгжих болно” гэж байв.
Нэр дэвшигч Ц.Элбэгдорж үндэсний үйлдвэрлэлээ дэмжиж хүүхдийн гутал худалдан авч, өөрсдөө хийж бүтээж байгаа бүх хүнийг төрийн бодлогоор дэмжихээ хэлээд худалдаа эрхлэгчдэд амжилт хүслээ.
Дараа нь нэр дэвшигч Ц.Элбэгдорж “Sunday” худалдаа, үйлчилгээний төвөөр орж, тэнд ажиллагсадтай уулзан мөрийн хөтөлбөрийнхөө “Монголдоо үйлдвэрлэе”, “Бүтээгчдээ дэмжинэ” хэсгийг танилцуулж тэдний асуултад хариулав.
Худалдаа эрхлэгчид Ерөнхийлөгчийн мөрийн хөтөлбөрийг, тэр дотроо үндэсний үйлдвэрлэл, баялаг бүтээгчдээ дэмжсэн хэсгийг талархан дэмжиж байгаагаа илэрхийллээ. Тэд “Бид таныг дэмжих болно. Нийт худалдаа, үйлчилгээ эрхлэгч, бүтээгчдэдээ Ардчилсан Ерөнхийлөгчөө дэмжихийг уриалж байна” гэлээ.