УИХ-ын гишүүн Ё.Отгонбаярын эхнэрийн дуулиант баривчилгааны талаарх маргаан үргэлжилж байна. Түүнийг хуулийн дагуу баривчилсан, хууль бус гэх мэтээр маргаан хүрээгээ нэмэх боллоо. Цагдаагийн газрын баривчилгаа төрийн ордон, чуулганы танхим хүртэл өндөрөө авлаа.
Баривчилгааны үеэр Булганд ажиллаж байсан Ё.Отгонбаяр Улаанбаатарт ирэхэд аль хэдийн асуудал өргөжсөн байсан юм. Ингэж өргөжихөд нөлөөлсөн хоёрхон зүйл бий. Мөнгөний хэмжээ болон дансны тоо. Нийт төгрөг, евро, юань, долларын 21 дансанд 425 сая доллар төвлөрүүлсэн тухай мэдээлэл цацагдсан. Толгой эргэм мөнгөний хэмжээ зарим хүмүүсийг ч ухаан алдуулахад хүргэсэн юм.
Харин хөдөөнөөс яаран сандран ирсэн Ё.Отгонбаяр Монгол телевизэд яриа өгөхдөө ийм зүйл байхгүйг баттай нотолно гэж мэдэгдэхийн зэрэгцээ эхнэрээ эргэх хүсэлтээ гаргасан гэж байсан. Харин өчигдөр прокурорын газраас мэдээлэл хийхдээ Ё.Отгонбаяр эхнэрээ эргэх хүсэлт гаргаагүй гэдгийг зарлаатхав. Бас л сонин өнцөг. Эхнэрээ баригдчихаад байхад эргэх хүсэлт гаргаагүй УИХ-ын эрхэм гишүүнийг юу гэж ойлгох уу гэсэн асуулт ч өрнөв. Ё.Отгонбаяр болоод прокурорын байгууллага хоёрын алинд нь итгэх вэ гэдэг эргэлзээ ч төрлөө.
Энэ талаар УИХ-ын гишүүн Ё.Отгонбаяраас тодруулахад тэрээр “эхнэрээ эргэх хүсэлтийг прокурорт биш мөрдөн байцаагчид гаргасан” гэж тайлбар хийв. Угаасаа мөрдөн байцаалтад байгаа учир хариуцаж байгаа газар нь хүсэлтээ илэрхийлэх хуультай аж. Ийм байхад дундуур нь прокурор орж ирээд үймүүлээд байгаа нь бас л анхааралт татах сэдэв боллоо.