Тагнуулын ерөнхий газрын Сөрөх тагнуулын газрын дарга Д.Цогтбаатарыг цагдан хориод 14 хоног болж байна. Тэгвэл өнөөдөр түүний цагдан хоригдох хугацаа дуусч байгаа юм. Д.Цогтбаатарын эхнэр Ч.Мандах нөхрийгөө гүтгэгдэл, явуулгаар хоригдсон гэж үзэж байгаа бөгөөд өнөөдрийн дотор хуулийн байгууллага түүнийг суллахгүй бол "ноцтой" баримтуудыг дэлгэнэ гэдгээ хэвлэлийнхэнд албан ёсоор мэдэгдсэн. Магадгүй өнөөдөр Д.Цогтбаатарын байцаалт үргэлжлэх юм бол маргааш түүний ар гэрийнхэн, өмгөөлөгчийн хамт хэвлэлийн хурал хийж зарим нэг нууц баримтуудыг дэлгэх юм. Мөн Д.Цогтбаатартай хамт алга болсон герман иргэний хамтран амьдрагч бүсгүйг шалгаж байгаа гэх мэдээлэл гадуур тархсан ч уг эмэгтэй мөн л сураггүй болсон байгаа юм.

Д.Цогтбаатар ямар учраас байцаагдаж эхлэв?

Өнгөрсөн хоёрдугаар сард Тагнуулын ерөнхий газрын, Сөрөх тагнуулын газрын хэлтсийн дарга, хурандаа Д.Цогтбаатарыг сэжигтнээр татан УМБГ-т  шалгаж байна гэж хэсэгтээ л шуугиж байсан.  Харин  эл  мэдээллийг тус газраас үгүйсгэж  байсан боловч тухайн үед хууль хяналтын байгууллага  дээрх эрхмийг шалгаж байгаа нь үнэн гэж хоёр талтай мэдээлэл гарч иргэдийг төөрөгдүүлж байсан юм. Тэгвэл  энэ талаар Цагдаагийн ерөнхий газрын Хэвлэл мэдээллийн төвийн дарга, цагдаагийн хурандаа Т.Сайнжаргалаас тодруулахад "Д.Цогтбаатарыг улсын мөрдөн байцаах газар шалгаж байгаа нь үнэн. Энэ хүнийг сураггүй алга болсон гадаадын иргэнийг эрэн сурвалжлах хэрэгт холбогдуулан шалгаж байна" гэсэн билээ. Өөрөөр хэлбэл түүнийг алга болсон гадаадын нэгэн иргэний хэрэгт сэжиглэж байгаа гэдгийг энэ үеэс олон түмэн мэдэх болсон юм. Эх сурвалжийн мэдээлж буйгаар тэр алга болсон гээд байгаа хүн нь ХБНГУ-ын иргэн Масимлян Лёонхарт Клойбер гэгч аж. Тэрбээр 2004 онд манай улсад ирсэн бөгөөд өдгөө ор сураггүй алга болжээ. Харин түүнийг манай улсад байх хугацаанд нь Д.Цогтбаатар хурандаа ихэд дотно харилцаатай байсан гэнэ. Ямартаа ч тэрээр өдгөө үхсэн, амьд нь мэдэгдэхгүй сураггүй алга болсон билээ.

Д.Цогтбаатарын холбогдоод байгаа хэргийг эзэн ХБНГУ-ын иргэн Масимлян Лёонхарт Клойбер гэгч хэн бэ?

Тэрбээр 2004 онд манай улсад иржээ. Түүнийг ХБНГУ-ын хууль хяналтын байгууллагаас луйврын томоохон хэрэгт холбогдуулж эрэн сурвалжилж буй гэнэ. Учир нь тэрээр нутагтаа луйврын томоохон хэрэгт холбогджээ. Тодруулбал, прамид хэлбэрээр сүлжээний бизнес эрхэлж байжээ. Ингэхдээ 2000 гаруй хүнээс их хэмжээний мөнгө залилан авч манай улсад иржээ.
М.Л.Клойбер Монголд хуурамч нэрээр, хувийн онгоц хөлөглөн 12 сая евротой ирсэн юм байна. Тэрээр хамтран амьдарч байсан монгол бүсгүйдээ Зайсанд дээд зэрэглэлийн орон сууц, үнэтэй хэд хэдэн машин авч өгчээ.  М.Л.Клойбер монголд орж ирэхдээ доктор Бауйэр Сандэрс гэдэг  нэрээр орж ирсэн байдаг. Гэхдээ буцаж гарсан гэх баримт бичиг байдаггүй аж.  Ямартаа ч манай улсад дээд зэрэглэлийн баян хүний амьдралаар амьдарч байхдаа Ё.Гантуяа гэх эмэгтэйтэй хамтран амьдарч бүр эхнэр, нөхөр гэж хэлэгдэх болжээ. Өдгөө хамтран амьдарч байсан гэх монгол бүсгүйг мөн л эрэн сурвалжилж байна.

Ё.Гантуяа гэгч өдгөө Германд 20 мянган еврогийн үнэд хүрээд байна

Энэ зууны зартай луйварчин эртэй нэр холбогдоод байгаа энэ бүсгүйг  Германы шүүхийнхэн бас л эрэн сурвалжилж эхэлсэн гэх мэдээлэл тархсан.  Яаж яваад монгол эмэгтэйтэй танилцаж, нэг гэрт хамтран амьдарч байсныг нь мэдэхгүй. Үнэндээ ямар ч гэмгүй монгол эмэгтэйг энэ герман эр хөлдөө чирч байгаа бол яана. Аль эсвэл хамтарч луйвар хийж байсан уу гэх мэтээр хүн бүр л өөр өөрсдийнхөөрөө таамаглана. Одоогоор Герман эрийн хөлөөс зүүгдэж чамгүй хөрөнгөжсөн Ё.Гантуяа гэгч Монголд байхгүй, Хонконг, Токио, Макаод байж болзошгүй гэсэн мэдээлэл л үлдсэн байдаг.  Германы шүүх Ё.Гантуяа, Максимлян Лёонхард Клойбер нарыг барьж өгсөн хүнд 20, 20 мянган еврогийн шагнал амлаад байна гэх.  Луйварчин герман эрийн хамтран амьдрагч Ё.Гантуяагийн тухайд тодорхой мэдээлэл байхгүй байгаа юм. Гэвч тун удахгүй тодорхой болох биз ээ.

Германаас ирсэн хоёр байцаагч хаана юу хийж байгаа нь тодорхойгүй

Одоо үхсэн, амьд эсэх нь тодорхойгүй байгаа эл германы иргэний хэрэг дээр манай хуулийнхантай хамтарч ажиллахаар ХБНГУ-аас хоёр мөрдөн байцаагч өнгөрсөн долоо хоногт ирсэн. Гэхдээ Мөрдөх албаны ажилтнууд Монголд ирсэн гэх ч хаана, ямар ажлаар, юу хийж яваа нь нууц байна.
Харин Д.Цогтбаатарын өмгөөлөгч хэлэхдээ “Энэ хэргийг шалгахаар Германаас хоёр мөрдөн байцаагч ирсэн. Ер нь Монгол Улсын нутаг дэвсгэрт хэрэг үйлдэгдсэн гэж үзвэл Монгол Улсын хуулиар, монголын эрх бүхий байгууллагууд шалгах ёстой. Ямар нэг гадаадын мөрдөгчид ирээд Монгол Улсын нутаг дэвсгэрт гэмт хэрэг мөрдөх хууль байхгүй” гэсэн юм.