Налайх дүүргийн II хороонд орших банкны салбарт нэвтрэн орж, хоёр сая төгрөг нэхэх үедээ банкны захирал бүсгүйн нөхрийг буудан хороосон А.Бат-Ялалтын хэргийг өнөөдөр Нийслэлийн шүүхэд хянан хэлэлцлээ.

Давж заалдах шатны шүүгчид анхан шатны шүүхээс оноосон 25 жилийн хорих ялыг хэрэгсэхгүй болгож, хэргийг нэмэлт мөрдөн байцаалтад буцаасан байна.

Хэргийг сануулвал, 2012 оны хоёрдугаар сарын 3 Тэтгэвэр, тэтгэмж тарааж эхэлсэн өдөр байсан тул иргэд банкны нэгдүгээр давхарт урт дараалал үүсгэн зогссон байжээ. Гэтэл 20 гаруй насны залуу банкны хамгаалагчид “Сурвалжлагч байна. Танай захиралтай уулзаж, ярилцлага авах гэсэн юм” гэж хэлээд захирал н.Туяагийн өрөөнд орж, түүний нөхрийнх нь хэвлий тус газарт буудаад, зугтжээ. Банкны захирлыг айлгаж мөнгө авах гэж буу тулгахад нөхөр нь урдуур нь орж ийнхүү хүнд шархатсан гэдэг. Түүнээс гадна банкны өөр ажилтан суманд өртөж, гэмтсэн байдаг. Хэвлийдээ хүнд шархатсан залууг нэн даруй Налайх дүүргийн нэгдсэн эмнэлэгт хүргэж, нарийн мэргэжлийн эмч нар зургаан цагийн турш мэс засал хийсэн боловч шархаа даалгүй нас барсан. Харин сэжигтэн А.Бат-Ялалтыг банкнаас гараад таксины жолоочийг барьцаалан зугтаж явахад нь Налайх дүүргийн ойролцоох Хонхор гэдэг газраас баривчилсан юм.