Татварын байцаагч эмэгтэй 75 удаа хутгалуулж амь насаа алдсан  хэрэг одоо ч намжаагүй байна. Одоогоор сэжигтэн болох Ч.Туяаг саатуулж, байцаалт авч байгаа төдийгүй Туяагийн хамтран амьдрагч болох Батболдоос ч байцаалт авч эхэлжээ. Өчигдөр хохирогч эмэгтэйтэй өмнө нь хамт ажиллаж байсан татварын байцаагч эмэгтэй эл хэргийг үйлдсэн гэдгээ хүлээн зөвшөөрөөд байгаа тухай бид мэдээлсэн.  Тэгвэл түүнийг баригдах үедээ согтуу байсан тухай ч эх сурвалж мэдээллээ. Тэрээр мэдүүлэгтээ "Миний нөхрөөс холд гэж олон удаа анхааруулсан. Би бага насны хүүхэдтэй учир нөхрөө явуулчихмааргүй байсан. Тэгээд архи ууж зоригоо чангалж байгаад талийгаачийг гэрээсээ гарч ирэх үед нь эл хэргийг үйлдсэн" гэж мэдүүлжээ. Ч.Туяа нь Чингэлтэй дүүргийн татварын хэлтэст ажиллаж байгаад жирэмсний амралтаа авсан аж.  Тус хэлтэст ажиллаж байхдаа Батболд гэгч залуутай танилцаж улмаар хүүхэдтэй болж амралтаа авчээ. Тэр хоёр нэг жил шахуу хамтран амьдарсан бөгөөд гэр бүлийн баталгаагүй юм байна. Улмаар Батболд гэгч нь хохирогч Э-гийн гэрээр орж гарах болсон нь Ч.Туяаг хэрэг үйлдэхэд хүргэжээ. Түүнчлэн хохирогч болох Э-г орцондоо утсаар ярьж байхад нь хоёр хутгаар нийтдээ 75 удаа сийчин хөнөөснийг шинжилгээгээр тогтоожээ. Мөн тухайн үед хэрэгтэн Ч.Туяа нь ганцаараа явж байсан нь эргэлзээтэй байгаа аж. Учир нь талийгаачийн бие үхлээс өмнө хөхөрч, няцарсан байх магадлалтай юм байна.  Харин сэжигтэн Ч.Туяа нь хэргийг ганцаараа үйлдсэн хэмээж байгаа аж. Ямартаа ч ийн хардалтаас болж нэг нь шороонд булагдаж, нөгөө нь шоронд орж байгаа юм.  Хүн амины энэхүү ноцтой хэргийг Улсын мөрдөн байцаах газар үргэлжлүүлэн шалгаж байна. Манай сайтын зүгээс ч шинэ мэдээллийг дор бүр нь хүргэх болно.