Баянгол дүүргийн 16-р хороонд байрлах нэгэн караокед 10 гаруй охин биеэ үнэлдэг байсныг Баянгол дүүргийн цагдаагийн нэгдүгээр хэлтэс илрүүлсэн. Энэ караокег гаднаас нь харахад ямар нэгэн хаяг байхгүй, хувь хүмүүст захиалгаар үйлчилдэг байсан талаар манай сайт мэдээлж байсан. Тэгвэл мэдээллийн мөрөөр Баянгол дүүргийн цагдаагийн хэлтэсийн цагдаагийн хошууч, ахлах ажилтан  Б.Бурмаагаас зарим зүйлийг тодрууллаа. 

Тэрбээр "Баянгол дүүргийн цагдаагийн нэгдүгээр хэлтсийн алба хаагчид мэдээллийн дагуу өчигдөр Баянгол дүүргийн 16 дугаар хорооны Орхоны тавдугаар гудамжинд байрлах 11 тоот хаягийг шалгасан байгаа. Энэ хаяг дээр очиж шалгалт хийхэд иргэн У нь өөрийнхөө гэрийг ямар ч зөвшөөрөлгүйгээр караоке, зочид буудлын зориулалтаар ашиглаж, зохион байгуулалт хийсэн байсан. Манай албан хаагчдыг шалгалтаар очих үед 10 гаруй ширээний эмэгтэй биеэ үнэлэгч байдлаар ажиллаж байгаад баригдсан байгаа.  Биеэ үнэлж байгаа эмэгтэйчүүдийн 90 хувь нь гадаадийн иргэнд биеэ үнэлж, зуучилдаг үйл ажиллагаа явуулдаг байсныг илрүүлэн шалгаж байна.  Одоогоор шалгалтын ажиллагаа явагдаж байгаа учир дэлгэрэнгүй мэдээлэл өгөх боломжгүй байна. Эмэгтэйчүүдийн хувьд 20-30 насны 10 гаруй эмэгтэй байгаа" гэв. Харин тус дүүргийн цагдаагийн хэлтсийнхэн сэтгүүлчдэд  биеэ үнэлэгчдийн "голомт" болсон гэр нэртэй караоке руу очиж танилцах зөвшөөрлийг өгсөн юм. Ингээд гадаад эрчүүдэд биеэ үнэлдэг байсан охид, бүсгүйчүүдийн "ажлын байр", "зугаа цэнгэлийн газар"-тай очиж танилцлаа. Энэ удаад Баянгол дүүргийн Орхоны 5 гудамжны 11 тоот хаяг дээр караоке, буудал ажиллуулж байсан газрын фото зургийг сонирхуулж байна. Харин дэлгэрэнгүйг маргааш хүргэх болно.