Японы хөрөнгө оруулалттай гэх компанид залилуулж, их хэмжээний мөнгөө
алдсан иргэн Х.Саранчимэг, Э.Ганзориг нар сэтгүүлчдэд мэдээлэл хийлээ.Монгол иргэн Япон улсын иргэнд хэрхэн залилуулав?
“Алтай Глобал” компанийн захирал Х.Саранчимэг, иргэн Э.Ганзориг нар "Эй Жэй Спирит" компанийн захирал Япон улсын иргэн Ажито Кожитой 2012 оны нэгдүгээр сард танилцаж Япон улсаас авто машины сэлбэг хэрэгсэл, тос тосолгооны материал оруулж ирэн, Монгол улсад борлуулж хамтран ажиллахаар болсон байдаг. Ингэхдээ хоёр талаас хөрөнгөө тэнцүү хуваан гаргахаар тохиролцож Х.Саранчимэг, Э.Ганзориг нарын зүгээс 2012 оны дөрөвдүгээр сараас 2012 оны арваннэгдүгээр сар хүртлэх хугацаанд нийт 30.0 сая төгрөгийн хөрөнгө оруулалт хийж, Монгол дахь дэлгүүр, ажилчдын цалин хөлсийг төлдөг байсан аж. Гэтэл энэ хугацаанд "Эй Жэй Спирит" компани Япон улсаас оруулж ирсэн бүтээгдэхүүнийн борлуултын орлогын мөнгөнөөс тохиролцсоноороо 50 хувийг өгөөгүйгээр барахгүй дистрибютерийн гэрээгээ зөвхөн өөрийн нэр дээр хийн түүнийгээ санаатайгаар нуун дарагдуулж, бусдыг онц их хэмжээгээр хохироосон байна.
Эл асуудлыг хөрөнгө оруулагч Х.Саранчимэг, Э.Ганзориг нар хөндөн гэрээ хийхийг удаа дараа сануулсан ч хүлээж авахгүй явсаар 2012 оны нэгдүгээр сард дэлгүүр, ажлын байр, гараашийн цоожыг сольж, тэдний хохирлыг төлөхгүй гэдгээ үг, үйлдлээрээ илэрхийлэх болсон байна.
"Эй Жэй Спирит" компанийн удирдлагынханы хувьд хамтарч ажиллаж байсан компаниа анхнаасаа хохироох зорилготой байжээ
Харин Х.Саранчимэг, Э.Ганзориг нарын хувьд анхнаасаа дистрибютерийн эрхтэй болно гэдэг утгаар өөрөөр хэлбэл, албан ёсны эрхтэй байгууллага бүтээгдэхүүнийг хямд үнээр авч давуу эрхтэй борлуулах боломж бүрдүүлдэг онцгой ач холбогдолтой эрх учраас Ажито Кожигийн тавьсан саналыг хүлээн авч амлалтад нь итгэн өөрсдийн хийж байсан бизнесээ зогсоож хөрөнгө оруулан хамтарч ажилласан байдаг. Гэтэл "Эй Жэй Спирит” компани бараа бүтээгдэхүүн борлуулсаны орлогыг авч байсан хэрнээ албан ёсоор тайлагнадаггүй, санхүүгийн баримт гаргаж өгөхөөс татгалзах, хамтарч ажиллаж байсан хүмүүсээ санхүүгийн хувьд ямар ч эрхгүйгээр ажиллуулах зэргээр наад захын бизнесийн ёс суртахуунийг уландаа гишгэж байсан нь анхнаасаа хамтарч ажиллаж байсан компаниа хохироох зорилготой байж гэж дүгнэхэд хүргэжээ.
Тиймээс Х.Саранчимэг, Э.Ганзориг нар хамтран ажиллахад оруулсан 30.422.667 төгрөг, үйл ажиллагаа явуулахад зарцуулсан зардал 19.578.338 төгрөгийг 2013 оны хоёрдугаар сарын 9-ны дотор төлөхийг хүсэж "Эй Жэй Спирит" компанид гомдлын шаардага гаргасан ч хүлээж авалгүй, санхүүгийн баримт гаргаж өгөөгүйгээдээ дулдуйдан дээрх хохирлыг барагдуулахаас эрс татгалзсан байна.
Япон захирал залилуулсан монгол иргэд хууль хяналтынханд ханджээ
Үүнтэй холбоотойгоор бүтэн найман сарын турш хөрөнгө мөнгө, хөдөлмөрөө зориулсан Х.Саранчимэг, Э.Ганзориг нар хууль хяналтын байгууллагад албан ёсоор хандахад хүрчээ.
30 саяын хөрөнгө оруулалт хийсэн нь мөрдөн байцаалтын явцад тогтоогдсон ч, хэргийг хэрэгсэхгүй болгож шийдвэрлэсэнд хохирогчид гомдолтой байна.
Шүүхээс хэргийг хэрэгсэхгүй болгосонд хохирогчид гомдол гаргажээ
Ийнхүү залилангийн хэргийн хохирогч болсон Х.Саранчимэг, Э.Ганзориг нар Улсын мөрдөн байцаах газарт 2013 оны хоёрдугаар сарын 22-нд гомдол гаргасны дагуу "Эй Жэй Спирит" компанийн захирал Ажито Кожиг хилээр гаргахыг хориглон эрүүгийн хэрэг үүсгэн шалгаж эхэлсэн юм.
Уг хэргийг УМБГ-ын дөрөвдүгээр хэлтсийн ахлах мөрдөн байцаагч, цагдаагийн хошууч Б.Цэнгэлбаяр шалгасан байна.
Сэжигтэн Ажито Кожи мэдүүлэг өгөхдөө, сэжигтэн Ажито Кожи 2013 оны тавдугаар сарын 29-нд өгсөн мэдүүлэгтээ “Х.Саранчимэг, Э.Ганзориг нар “Эй Жи Спирит” компанид 30.422.667 хийгээгүй” гэсэн байдаг ч 2013 оны зургадугаар сарын 27-нд “Алтай Глобал” компанитай хамтран ажилласан талаар санхүүгийн тооцоо нийлнэ. Гарсан зардал олсон орлогоо тооцоод хэдэн төгрөг авч өгөхөө тохирно” хэмээн өмнөх мэдүүлгээ үгүйсгэж, дээрх мөнгөн дүнтэй хөрөнгө оруулалт хийснийг хүлээн зөвшөөрсөн нь цагаан дээр хараар бичигдсэнийг доорх баримтаас харж болно.
Үүнийг нь ч шалгалтын явцад тогтоосныг цагдаагийн хошууч Б.Цэнгэлбаяр 2013 оны зургадугаар сарын 4-нд Шүүхийн шинжилгээний үндэсний хүрээлэнд гаргасан эдийн засгийн шинжилгээ хийлгэх тухай тогтоолдоо дурьдсан байдаг. Тэрбээр, “Х.Саранчимэг, Э.Ганзориг нар 2012 оны дөрөвдүгээр сард “Эй Жи Спирит” компанийн захирал Ажито Кожитой Япон улсаас тос тосолгооны материал оруулж ирэн борлуулалт хийж борлуултын ашгийг 50, 50 хувиар хувааж авахаар тохиролцож 30.422.667 төгрөгийн хөрөнгө оруулалт хийсэн байна” гээд дээрх хоёр компанийн дунд үүссэн тооцоо, өр төлбөр гарсан зардлыг нарийвчлан тогтоохоор шинжилгээ хийлгэжээ.
Гэвч уг эдийн засгийн шинжилгээг зөвхөн “Эй Жи Спирит” компанийн баримтад тулгуурлаж хийсэн тул 30.422.667 төгрөгийг санхүүгийн тайланд тусгасан баримт материал байхгүй гэх дүгнэлт гарч.
Улмаар компани “ашиггүй” ажилласан гэх үндэслэлээр уг хэргийг дахин хэрэгсэхгүй болгосон
Уг хэргийг хянасан Нийслэлийн прокурорын газрын мөрдөн шалгах ажиллагаанд хяналт тавих хэлтсийн хяналтын прокурор О.Гэрэл энэ сарын 18-нд компани “ашиггүй” ажилласан гэх үндэслэлээр уг хэргийг гэмт хэргийн бүрэлдэхүүнгүй хэмээн үзэж хэрэгсэхгүй болгожээ.
Үүний өмнө өнгөрсөн дөрөвдүгээр сард Нийслэлийн прокурор О.Сарангэрэл мөн л уг хэрэгт эрүү үүсгэхээс татгалзсан хариу өгсөн байна.
Хохирогчид Нийслэлийн прокурорын газарт гомдол гаргаснаар хэргийг хэрэгсэхгүй болгох тогтоолыг хүчингүй болгожээ
Үүнийг эс зөвшөөрсөн хохирогчид "Эй Жи Спирит" компанийн захирал Ажито Кожигийн талыг баримтлан 50:50 хувийн борлуулалтын ашиг хувааж авахаар тохирсон юм шиг гуйвуулсан, мөн тухай бүр зардлаа хянан, орлого зарлагын тооцоо нийлж байсан мэтээр илтэд гэрээний эрхийн харилцаа мэт харагдуулахаар үндэслэлгүйгээр эрүүгийн хэрэг үүсгэхээс татгалзсан нь хууль зөрчсөн, гэмт этгээдийг хаацайлсан үйлдэл хэмээн үзэж Нийслэлийн прокурорын газарт гомдол гаргасан байна. Үүнийг Нийслэлийн прокуроын орлогч дарга Ц.Батболд хянаж үзээд хэргийг хэрэгсэхгүй болгох тогтоолыг хүчингүй болгож, прокуорын даалгавар бичин хэргийг Улсын мөрдөн байцаах газрын Хүнд гэмт хэрэгтэй тэмцэх хэлтэст 2013 оны тавдугаар сарын 13-нд шилжүүлсэн байдаг. Нөхцөл байдал ийнхүү сэжигтний талд шийдэгдсэнд хохирогчид гомдолтой байгаагаа илэрхийлж өнөөдөр НПГ-т гомдол хүргүүлэхээр болсон байна.
Хохирогчид Ажито Кожиг бусдыг залилах зорилгоор хууль бусаар компани байгуулсан гэж үзэж байна
Тэд Эрүүгийн хэрэг үүсгэх нотлох баримт хангалттай байхад шалгалгүй орхигдуулсан гэж үзэх нотлох баримт бүхий хэд хэдэн үндэслэл байгааг дор дурьдаж байна.
Тухайлбал, Ажито Кожи Монгол улсад гадаадын хөрөнгө оруулалттай компани байгуулахдаа 100 000 ам.доллартай тэнцэх дүрмийн санг хуурамч бичиг баримт үйлдэн бүрдүүлж "Эй Жэй Сприт" компанийг байгуулсан тухай гэмт хэргийн шинжтэй гомдол мэдээллийг шалгуулахаар өгсөн боловч мөрдөн байцаагч үүнийг нягтлан шалгаагүй байна. Уг ноцтой асуудлыг гэрчлэх гэрч байгааг ч энд дурьдах хэрэгтэй. Бүр нарийн ярьвал Ажито Кожи ч үүнийг баталсан байдаг.
Тодруулбал, тэрээр мөрдөн байцаалтын явцад өгсөн мэдүүлэгтээ “Монголд хөрөнгө оруулагчаар оршин сууж байгаа. Эхнэр Ц.Хангалтай гэр бүл болохоосоо өмнө "Эй Жэй Сприт" компанийг үүсгэн байгуулсан гэсэн хэрнээ дараа нь “Компани үүсгэн байгуулахад дүрмийн сан 125 сая төгрөгийг дансаар байршуулаагүй. Ц.Хангал бид хоёр өөрсдийн компанийн өмчлөлд оруулсан эд хөрөнгөө үнэлээд дүрмийн санг нь 120 сая төгрөг болсон” хэмээн мэдүүлсэн байна. Уг нь Гадаадын хөрөнгө оруулалтын тухай хуулинд компанийн дүрмийн сангийн мөнгийг бэлнээр банкинд байршуулах тухай тодорхой заасан байдаг аж. Тэгэхээр тус компанийн гэрчилгээн дээр бичигдсэн ХААН банкны 5027546952 тоот дансны хуулгыг анх нээлгэсэн үеэс гаргуулан авч гэрчүүдээс мэдүүлгийг авч эл хэргийг шийдвэрлэх боломжтой гэж үзэж байгаа юм.
Түүнчлэн Япон улсад үйл ажиллагаа явуулдаг Фортек/Fortec/,Пиа/РIAA/,Эмон/Аmon/,Санфорс/Sunforce,/Пролинкс/Prolinks/ компаниудын бүтээгдэхүүнийг борлуулах дистирбютерын таван эрхийн хоёрыг нь хууль ёсны дагуу авсан хэрнээ хаанаас авчирсан нь үл мэдэгдэх гэрчилгээнүүдээр хөрөнгө оруулагчдийг хуурч мэхэлсэн зэрэг маш олон асуудлыг нягталж залилан мэхлэх гэмт хэргийн субьектив талын үндсэн шинж болох бусдын эд хөрөнгийг хуурч мэхлэх итгэл эвдэх аргаар авсныг тогтоох боломжтой хэмээн үзэж байна.
Гэтэл хууль хяналтын байгууллага ийм тодорхой хэргийг эсрэг талд нь шийдэж байгааг юу гэж ойлгох вэ. Үүний ард ямар нэгэн ашиг сонирхол байгаа юм биш биз гэсэн хардлага байгааг энд дурьдах нь зүйтэй.
Д.Ундрах /24tsag.mn/
Сэтгэгдэл (15)