Эрүүл мэндийн сайд Н.Удвал Японы Сакура группын ерөнхийлөгч, Омета группын эмнэлгийн тоног төхөөрөмжийн үйлдвэрлэл, техникийн тусламж хариуцсан дарга ноён Кэничи Мацумотог хүлээн авч уулзлаа. Талууд эрүүл мэндийн салбарт хоёр орны харилцаа, хамтын ажиллагааг өргөжүүлж, олон улсад хүлээн зөвшөөрөгдөхүйц дэвшилтэт технологи бүхий эмнэлгийн багаж, тоног төхөөрөмжийг нийлүүлэх, хорт хавдрыг эд эсийн түвшинд эрт оношлох, эмчлэх чиглэлээр хамтран ажиллах талаар санал солилцсон юм.Ноён Кэничи Мацумото цаг зав гарган хүлээн авч байгаад талархлаа илэрхийлээд хэлэхдээ, “Эмнэлгийн байгууллагуудад шаардлагатай тоног төхөөрөмжийг нийлүүлэх нь чухал ч эмч, мэргэжилтнүүдийн ур чадварыг сайжруулах, тоног төхөөрөмжийг засварлах инженерүүдийг бэлтгэх нь илүү ач холбогдолтой. Манай групп БНХАУ, Вьетнам, Молдави зэрэг хэд хэдэн улстай эмнэлгийн тоног төхөөрөмж нийлүүлэх, мэргэжилтэн бэлтгэх, сүрьеэ, ДОХ, хорт хавдрын зайн оношлогоог идэвхижүүлэхээр хамтран ажиллаж байгаа. Сүүлийн жилүүдэд дэлхий нийтээр хорт хавдрын өвчлөл түгээмэл болж байна. Ялангуяа умайн хүзүү, түрүү булчирхайн хавдрууд ихэссэн. Японд хавдрыг эрт зөв оношлох талаар урт удаан хугацаанд судалгаа хийсний дүнд зайн оношлогоог амжилттай туршаад байгаа юм. Монгол улс ч зайн оношлогоог нэвтрүүлж, өөрийн орондоо эмч, инженерүүдээ бэлтгэдэг болох хэрэгтэй. Бидний зүгээс хамтран ажиллаж, тусламж үзүүлэхэд бэлэн байгаагаа илэрхийлмээр байна” гэв. Мөн Монголын эмнэлгүүдэд нийлүүлсэн багаж, төхөөрөмжүүд олон улсын стандартад нийцэхгүй байгаа нь тендерийн үйл ажиллагаатай шууд холбоотойг ноён К.Мацумото онцлов.
Эрүүл мэндийн сайд Н.Удвал, “Таны хэлсэн санал бүр манай салбарт тулгамдаж байгаатай санал нэг байна. Өмнөх жилүүдэд явуулсан хариуцлагагүй тендерийн хор уршиг өдийг хүртэл гомдол дагуулсаар байгаа. Шинэчлэлийн Засгийн газар, Эрүүл мэндийн яам энэ бүх гажуудлыг засахыг хичээж, шаргуу ажилласаар байна. Гэсэн ч тийм амар асуудал шийдэгдэхгүй байна. Засаж залруулахад тодорхой цаг хугацаа шаардлагатай байдаг юм байна. Энэ жилээс эхлээд яамны зүгээс аливаа тендерийг зарлахдаа мэргэжлийн зөвлөлөөр хэлэлцүүлж, аль эмнэлэгт ямар үзүүлэлт, хүчин чадалтай тоног төхөөрөмж хэрэгцээтэй байгааг тодорхойлж захиалга өгдөг болж байгаа” гэлээ.
Түүнчлэн Эрүүл мэндийн яамны бодлогын хүрээнд Япон улсад эмнэлгүүдийн удирдлага, менежерүүдийг удирдлагын менежментээр, аймаг, нийслэлийн эмнэлгүүдийн эрчимт эмчилгээ, сэхээн амьдруулах тасгийн эмч, сувилагчдыг БНСУ-д тус тус сургалтад хамруулахаар ажиллаж буйгаа салбарын сайд хэлсэн юм. Цаашид Японы Сакура болон Омета групптэй эмнэлгийн байгууллагуудад ажиллах чадварлаг инженерүүдийг бэлтгэх чиглэлээр хамтын ажиллагаа эхлүүлэх болно гэдгээ Эрүүл мэндийн сайд Н.Удвал илэрхийллээ хэмээн ЭМЯ-аас мэдээллээ.
