Оюутолгойн далд уурхайн үйл ажиллагааг зогсоосноос гүйцэтгэгч компаний 2000 орчим ажилчин ажлаас чөлөөлөгдсөн тушаал авч эхлээд байгаа. Заримыг нь зургаан сарын дараа ажилд нь эргүүлэн авна гэж байгаа ч Засгийн газар болно “Рио Тинто”-гийн хэлэлцээрээс болж хэр хугацаанд хойшлох нь тодорхойгүй байна. Гэтэл манай Засгийн газар болон Үйлдвэрчний эвлэлээс үүнд ямар нэг байр сууриа илэрхийлж чадахгүй байна. Учир нь ингэж монгол ажилчид цалин сайтай ажлын байрнаасаа олноороо халагдсан нь Монголын Засгийн газар муу ажилсантай холбоотой гэж зарим хүн дүгнэж байна. Хөрөнгө оруулалтын хэмжээ нэмэгдсэн асуудлыг сүр бадруулан хэдэн сар ярьсан ч  олигтой шийдвэрт хүрсэнгүй. “Рио Тинто” ч хүлээлтийн байдалд орж, ажлаа ийнхүү зогсоогоод байгаа юм. Манай сайд нар Оюутолгойн гэрээнд өөрчлөлт оруулах ёстой гэдэгт санал нэгдсэн ч хэрхэн, яаж вэ гэдгээ одоо хүртэл ололгүй толгой гашилгаж байна.

     Тэдний толгой гашилж байх хооронд ийнхүү 2000 айл хоногийн хоолондоо санаа зовоход хүрээд байна. Ихэнхи нь орон сууц, лизенгийн зээлтэй тул гэнэт ажилгүй болсон нь тун хүндээр тусч эхэллээ. Хэзээ ажилдаа эргэж орох нь ч тодорхойгүй болсон эдгээр иргэд Засгийн газрын муу ажилсны дүнд ийнхүү модоо барихад хүрч байна. Тэдэнд ажлаас халагдах тушаалыг нь уншаад унаанд суулгаж, Улаанбаатарын ажилгүйчүүдийн эгнээг нэмлээ. Дарга нар нь далд уурхайн үйл ажиллагаа зогссон тул өөр аргагүй хэмээн учирлаж байгаа бол ажилгүй болсон ажилчид хэн нэгэн эрх мэдэлтэн энэ асуудалд анхаарлаа хандуулаасай гэж хүсч байна. Тэдний зарим нь МҮЭХ-ны хүндэт Ерөнхийлөгч С.Ганбаатарт хандахаар зэхэж байгаа гэж эх сурвалж мэдээлэв. УИХ дотор Оюутолгойн асуудлаар дагнан эрс шүүмжилдэг, монгол ажилчдын эрх ашгийг хамгаална гэж ярьдаг тул ийнхүү С.Ганбаатар гишүүнд итгэл найдвараа тавьж эхэлжээ. Хэдийгээр С.Ганбаатар гишүүн Оюутолгойн гэрээнд өөрчлөлт оруулах хэлэлцээрийн ажлын хэсэгт багтаагүй ч энэ асуудлаар багагүй мэдлэгтэйн дээр нөлөөлөлтэй болж чадсан гэж дүгнэж байгаа аж.

   Ямартаа ч “Оюутолгой”-гоос халагдсан 2000 ажилтныг аврах үүрэг С.Ганбаатар гишүүнд оногдов. Цаашид бодлоготой ажиллахгүй бол нөгөө “цааш” гээд түлхээд байсан “Оюутолгой”-гоос дахиад хэдэн мянган хүн ажилгүйчүүдийн эгнээнд шилжихийг үгүйсгэхгүй байгаа юм. Үйлдвэрчний эвлэлийг олон жил толгойлж байсан хүний хувьд С.Ганбаатар гишүүн юу хийж чадах бол гэж олон нийт харж байна.