Өчигдөр 22.30 цагийн орчимд “Сандэй” худалдааны төвд гал гарсан. Үүссэн нөхцөл байдалтай холбогдуулан НОБГ-аас мэдээлэл хийлээ. Тус худалдааны төвийн долоон давхарт үйл ажиллагаа явуулдаг цайны газарт гал гарсны улмаас дээврийн  хэсэг шатсан гэсэн урьдчилсан таамаг байна. Одоогийн байдлаар тус худалдааны төв нь хэвийн ажиллаж байгаа бөгөөд нэг ч түрээслэгч хохироогүй гэж НОБГ-аас мэдээлж байгаа юм.

Гэхдээ "Сандэй" худалдааны төв нь үйл ажиллагаа явуулах зөвшөөрөлгүй байсан байна. Тодруулбал, Онцгой байдлын албанаас “Сандэй” худалдааны төвийг байгуулагдсан цагаас нь хойш галын аюулгүй байдлаас урьдчилан сэргийлэх үзлэг, шалгалт хийж, 2010, 2011, 2013 онд хариуцлага тооцож байжээ. Шалгалтаар нэлээд зөрчил илэрсэн бөгөөд тус худалдааны төв нь анхны зураг төслийн дагуу баригдаагүй, барилгын зураг төслийг өөрчлөхдөө холбогдох байгууллагуудад мэдэгдэж, зөвшөөрөл аваагүй, авралтын зам гарцыг хаасан, урсдаг шат болон хоёр талын шатыг хааж лангуу байрлуулсан, шатны хонгилуудад утаа үл нэвтрэх хаалт хийгээгүй болох нь илэрч байжээ. Мөн гадна талын нүүрний хэсэг буюу бүх цонхыг төмөр хийцээр хааж, торлосон нь гаднаас нь авралтын ажиллагаа явуулах боломжгүй болгосон гэсэн үг аж. Зарим газарт цахилгааны монтаж, холболт хийгээгүй, гал мэдрэгч суурилуулсан хэрнээ гал унтраах төхөөрөмж суурилуулаагүй. Мөн ослын үед гарцыг заах ослын гэрэлтүүлэггүй байсан байна.  Худалдааны төвд гал унтраах усан хангамж байхгүй байсан нь өмнө нь хийсэн хэд хэдэн удаагийн шалгалтаар батлагдаж байжээ.

Тиймээс  Онцгой байдлын газраас 2012 онд тус худалдааны төвд 250 мянган төгрөг, 2013 онд худалдааны төвийн гурван албан тушаалтанд 180 мянган төгрөгийн торгууль ногдуулж байсан байна. Мөн 2013 оны дөрөвдүгээр сард тус худалдааны төвийн үйл ажиллагааг зогсоох шийдвэр хүргүүлсэн. Үндсэндээ одоо “Сандэй” худалдааны төвийн үйл ажиллагаа зогссон байх ёстой гэнэ. Саяхан шатсан "Нарантуул" зах ч үйл ажиллагаа явуулах зөвшөөрөлгүй байсан билээ.

24tsag.mn