Анхан болон давж заалдах шатны шүүхээс УИХ-ын гишүүн Ц.Нямдоржийг УИХ-ын гишүүн, ҮХАА-н сайд Х.Баттулгаас уучлалт гуйх ёстой гэсэн шийдвэр гаргасан билээ. Гэвч УИХ-ын гишүүн Ц.Нямдорж хоёр шатны шүүхийн шийдвэрийг эс зөвшөөрч Улсын Дээд шүүхэд гомдол гаргасан байна. Түүний гомдлыг Улсын Дээд шүүх энэ сарын 12-нд буюу маргааш хэлэлцэх талаар эх сурвалж мэдээллээ.

Хэргийг сөхвөл, Ц.Нямдорж өнгөрсөн оны дөрөвдүгээр сард ХЗДХ-ийн сайд байхдаа  хэвлэлийн бага хурал зарлаж, Х.Баттулгыг төмөр зам байгуулах нууц гэрээ байгуулсан хэмээн мэдээлсэн юм.

Х.Баттулга энэхүү мэдээллийг гүтгэлэг хэмээгээд нэр төрөө сэргээлгэхээр Чингэлтэй дүүргийн шүүхэд хандсан. Дээрх маргаан  шийдвэрлэгдэхгүй жил гаруй  сунжирсны эцэст  Чингэлтэй дүүргийн шүүх  Ц.Нямдоржийг хэвлэл мэдээллийн хэрэгслээр уучлалт гуйхыг анхан шатны шүүхээс даалгасан билээ.