“Урт нэртэй” хуульд өөрчлөлт оруулахаар жагсаал, цуглаан зохион байгуулсан “Гал үндэстэн” холбооныхон Төрийн ордон руу буудаж, энд тэндгүй тэсрэх бөмбөг байрлуулсан хэрэг өчигдөр гарав. Тиймээс ТЕГ-аас тэдэнд Эрүүгийн хуулийн тусгай ангийн 177.1, 91.2.13-т зааснаар эрүүгийн хэрэг үүсгэн шалгаж байгаа.

Тодруулбал, эрх бүхий байгууллага, албан тушаалтнаас тодорхой шийдвэр гаргуулах буюу гаргахаас татгалзуулахад шууд буюу шууд бус нөлөөлөх зорилгоор, олон нийтэд айдас төрүүлэхэд чиглэсэн нийтэд аюултай хүч хэрэглэсэн, хэрэглэхээр заналхийлсэн, мөн нийтэд аюултай аргаар хүний амь насанд халдахыг завдсан хэмээн буруутгаж байгаа юм. Учир нь тэд Төрийн ордны арын хашаа, “Централ Таур”-ын урд байрлах хогийн сав, БОНХЯ-ны урд талын цэцгийн мандалд тэсрэх бодис байрлуулсан байв.

Уг мэдээллийн дагуу ЦЕГ, ТЕГ, ЗХ-084 анги, Онцгой байдлын байгууллагууд хамтран ажиллагаа явуулж, гурван буу, гараар хийсэн есөн гранат, 36 ширхэг сум хурааж авсан билээ. Уг тэсрэх бодис нь алимны жүүсний хайрцагны хэмжээтэй тротил хэмээх тэсрэх бодис байсан аж. Тиймээс цагдаагийн байгууллага хэргийн газрыг бүрэн хяналтад авч, эргүүл шалгалтыг зохион байгуулан өндөржүүлсэн бэлэн байдалд шилжин ажиллаж байгаа юм. Түүнчлэн тэсрэх бодис тавьсан хэрэгт “52-13” УБП улсын дугаартай, хөх саарал өнгийн “Элентра” маркийн автомашин, жолооч Б.Цогбадрал гэгчийг яаралтай эрэн сурвалжлах ажлыг зохион байгуулж байна.