Өнгөрсөн хоногт нийслэлийн Онцгой байдлын газарт объектын гал түймрийн 11, гал түймрийн зөрчлийн 1 дуудлага ирж дүүргүүдийн Онцгой байдлын хэлтсийн Аврах, гал унтраах ангийн бүрэлдэхүүн шуурхай арга хэмжээ авч ажиллажээ.  Тухайлбал, Сонгинохайрхан дүүргийн 28 дугаар хороо, Сансарын гудамжинд  хашаа шатаж байна гэсэн дуудлагаар Аврах, гал унтраах 29 дүгээр ангийн тасгийг гаргахад эзэнгүй айлын 6 метр хашаа шатаж байсныг унтраажээ.  Мөн Баянзүрх дүүргийн 14 дүгээр хороо, ХӨСҮТ-ийн хойно машин шатаж байна гэсэн дуудлагын дагуу Аврах, гал унтраах 10 дугаар ангийн 1 дүгээр тасгийг  гаргахад Аксент загварын суудлын автомашин шатаж байсныг унтраажээ.  Түүнчлэн Баянзүрх дүүргийн 8 дугаар хороо, Хууль сахиулах их сургуулийн урд машин шатаж байна гэсэн дуудлагаар Аврах, гал унтраах 63 дугаар ангийн тасгийг  гаргахад "Тоёото лексүс-470" загварын суудлын автомашиний хөдөлгүүрийн хэсэг шатаж байсныг унтраасан байна. Сүүлийн үед жолооч нар автомашинаа эзэнгүй, хараа хяналтгүй газар тавьсан мөн эд ангийг нь шалгаагүйгээс болж автомашин шатах тохиолдол эрс ихэссэн гэдгийг Нийслэлийн онцгой байдлын газраас анхааруулж байна.