Өнгөрсөн наймдугаар сард гарсан байлдагчийг дарамталж зүү залгиулсан гэх хэрэгт холбогдуулан  байлдагч  П.Хэнмэдэхэд Увс аймгийн цагдаагийн газраас эрүүгийн хэрэг үүсгэн шалгах хүсэлтийг ХХЕГ-ын удирдлагуудад илгээжээ.

Тодруулбал цагдаагийн хурандаа Д.Бадамрагчаагаас ХХЕГ-ын дарга, бригадын генерал Ш.Лхачинжавт илгээсэн хүсэлтэд “Хилийн 311 дүгээр ангид хугацаат цэргийн алба хааж байсан Хөвсгөл аймгийн Цагаан-Уул сумын харьяат, байлдагч Пүрэвдоржийн Хэнмэдэхийг бэлтгэл заставын офицер, дэслэгч Н.Баатар зодож, дарамтлан зүү залгиулсан тухай мэдээллийн дагуу шалгахад П.Хэнмэдэхэд дарамт учруулсан нь тогтоогдоогүй. Харин байлдагч П.Хэнмэдэх нь цэргийн албанаас зайлсхийх зорилгоор өөрийн биед гэмтэл учруулж, зүү залгисан болох нь тогтоогдсон тул түүнд холбогдуулан Эрүүгийн хуулийн 280 дугаар зүйлийн биедээ гэмтэл учруулах замаар цэргийн албанаас зайлсхийсэн гэсэн үндэслэлээр эрүүгийн хэрэг үүсгэн шалгаж байна. Тиймээс хилийн 0164 дүгээр ангид байгаа байлдагч П.Хэнмэдэхэд эрүүгийн хэрэг үүсгэх үндэслэлтэй байгаа тул түүнийг мөрдөн байцаалтад ирүүлнэ үү” гэсэн байна.

Түүнийг ХХЕГ-аас хараахан цагдаагийн байгууллагад шилжүүлээгүй байгаа бөгөөд тэрээр өөр ангид байгаа юм. Хэрэв шилжүүлбэл Увс аймгийн цагдаагийн газар энэ сардаа багтаан мөрдөн байцаалтыг нь дуусгаж, прокурор, шүүхэд шилжүүлэхээр төлөвлөжээ.