МАХН-ын дарга Н.Энхбаяр Солонгос улсад эмчлүүлээд хоёр сар гаруйн хугацаа өнгөрч байна. Энэ хооронд түүний биеийн байдал өмнөхөөсөө дээрдэж байгаа ч бүрэн эдгээгүй, нарийн шинжилгээ хийлгэх хэрэгтэй байгаа талаар намынхан нь мэдээллээ. Түүнийг Монголд эмчлэх боломжгүй эсийн задрал гэсэн өвчний оноштойгоор Солонгос руу явуулаад байгаа билээ. Н.Энхбаярыг О.Цолмон нь сахиж байгаа бөгөөд намын зарим гишүүд, хамаатнууд нь эргэхээр визээ хөөцөлдөж байгаа аж.

   Харин Н.Энхбаярын гэр бүлд нэгэн асуудал тулгараад байгаа нь эмчилгээний зардал аж. Монголд эдгэх боломжгүй гэсэн Н.Энхбаярын өвчнийг Солонгост эмчлэхэд багагүй мөнгө шаардагдаж байна. Шүүхээс Н.Энхбаярыг авлигын хэрэгт буруутай гэж үзэн эд хөрөнгийг нь битүүмжилж, дансанд байрлах 9 сая орчим ам долларыг нь хураах шийдвэр гаргасан тул төлбөрөө нэг мөсөн бүрэн төлөх боломжгүй байгаа бололтой.

   Ямартаа ч тэрбээр он гартал Солонгост байх тул өөрийнх нь эмчилгээний зардал, гэр бүлийн хүнийх нь хоол унд, байрны төлбөр өдөр ирэх тусам нэмэгдсээр байгаа аж. Н.Энхбаярын эмчилгээнд чухам хэдэн төгрөг хэрэгтэй байгаа нь одоогоор нууц байгаа бөгөөд “их хэмжээний” гэдгийг намынхан нь тодотгож байна.

    Уг нь анх түүнийг уучлалаар суллагдаж, Солонгост эмчлүүлэхээр явахад нь МАХН-ын ахмад гишүүд, эмэгтэйчүүд мөнгө цуглуулах аян өрнүүлэх санал гаргажээ. Гэсэн ч Н.Энхбаяр “амьдрал хэцүү байхад ард иргэдээсээ мөнгө авахгүй” хэмээн зөвшөөрөөгүй гэв. Харин МАХН-ын удирдлагууд түүний эмчилгээний төлбөрийг төр өгөх ёстой гэсэн байр суурьтай байна. Тус намын Ерөнхий нарийн бичгийн дарга Г.Шийлэгдамба “Монголын төр энэ хүнийг хэлмэгдүүлсэн болохоор төр эмчилгээний зардлыг нь даах ёстой” гэжээ. Тэд энэ хүсэлтээ албан ёсоор тавиагүй байгаа ч гишүүд нь ийм байр сууринд нэгдэж байгаа аж.

   Нэг цагт улсын Ерөнхийлөгч явсан, төрийн гурван өндөр албан тушаалыг хашиж байсан энэ хүнд мөнгөний асуудал тулгарчээ. Төрөөс түүнд туслах ёстой гэсэн хууль байхгүй ч намынхан нь ийм байдалд оруулсны төлөөсийг төрөөс нэхнэ хэмээж байна.