Манай нийгэмд яг одоо хамгийн тулгамдаад байгаа асуудал бол хөдөлмөр аюулгүй байдлаа хангаж ажлаагүйгээс үүдэлтэй осол аваар юм. Өмнө нь бичил уурхайчид хөдөлмөр аюулгүй байдлаа хангаагүйгээс осолдож, угаартаж, шороонд дарагдаж байна гэх мэдээллүүд өдөр алгасахгүй гардаг байсан. Тэгвэл өдгөө барилгын осол аваар маш ихээр гарах боллоо. Үүнд иргэд төдийгүй цагдаа нар ч эмзэглэж байна. Тэд хүн үхсэн, хутгалуулсан, хулгай зэлгий гэх мэдээллийн сэрэмжлүүлгийг нийгэмд хүргэх нь зөв ч хөдөлмөрийн аюулгүй байдлаа хангаж ажлаагүйгээс хүний амь нас эрсдэж байгааг бүр түлхий тусгаж өгөхийг ч хэвлэл мэдээллийн хэрэгслийнхнээс хүсч байгаа юм.

Ингээд барилга дээр гарч байгаа ослын талаар ЦЕГ-ын хэвлэл мэдээллийн ажилтан Ч.Лхагвасүрэнгээс тодрууллаа.

-Барилга дээр осол гарлаа гэх мэдээлэл өдөр бүр гарах болжээ. Хэрэв барилгын ослоос болж хүн бэртэх, амь насаараа хохирсон тохиолдол хэн хариуцлага хүлээх вэ?
-Хөдөлмөр аюулгүй байдлаас үүдэлтэй хэрэг бол яах аргагүй тухайн байгууллагын болоод хувь хүний хариуцлагаас болдог.  Тухайн барилга дээр барилгын инженер, аюулгүй байдлын инженер, хөдөлмөр аюулгүй байдлын инженерүүд томилогдон ажиллах ёстой.

Мөн тухайн барилгын компани ямарваа нэг байгууллагаар ажлаа гүйцэтгүүллээ гэхэд аль аль талаас нь инженер гарч эл барилгад хяналт тавих ёстой. Гүйцэтгэж байгаа компанид ч барилгын инженер, талбайн инженер, хөдөлмөр аюулгүй байдлын эрх бүхий инженер гэж байх ёстой. Эдгээр нь нийлж тухайн барилгад хяналт тавих үүрэгтэй. Хөдөлмөр аюулгүй байдлын инженер тухайн ажилчид хөдөлмөр аюулгүй ажиллагааныхаа дүрмийг сахиж байна уу?.Өндөр дээр ажиллахад бэхэлгээгэн хийж байна уу, бэхэлгээний стандартыг биелүүлж байн уу гэдгийг хянах ёстой.

Өглөө ажилд нь гарахад нь тухайн инежер бүгдийг нь шалгаад зааварчилгаа өгч гарын үсэг зуруулсан байх шаардлагатай. Хэрэв хөдөлмөр аюулгүй байдлын инженер энэ бүхнийг хийгээгүй бол хариуцлага хүлээж эрүүгийн хэрэг үүсгэгдэнэ. Өөрөөр хэлбэл, албан тушаалдаа хайнга хандсан гэдгээр эрүүгийн хэрэг үүснэ.

-Хэрэв тухайн байгууллага хөдөлмөр аюулгүй байдлын инженергүй, авч ажлуулаагүй бол яах вэ?
- Хэрвээ тийм хүн байхгүй буюу тухайн компани ийм ажилтан томилоогүй бол компанийн захирал хариуцлага хүлээнэ. Заавал ийм албаны хүн байх ёстой гэсэн дүрэм байхад үүнийг биелүүлээгүй тохиолдолд захирал буюу барилгыг хариуцаж байгаа хүн хариуцлага хүлээх ёстой.

-Барилгын осол аваарт ихэвчлэн хэд орчим насны хүмүүс өртөж байна вэ?
-Дандаа хөдөлмөрийн насны залуучууд амь үрэгдэж нэг бол бэртэж байна. Үнэхээр яалтачгүй анхаарал хандуулах асуудал бол энэ. Дөнгөж сургуулиа төгсөөд очсон хүүхэд ч байна. Зуны амралтаараа ажиллаж байгаа залуус ч байна. Дандаа залуу эд хийж бүтээх насан дээрээ байгаа хүмүүс тухайн байгууллагын буруутай үйлдлээс болж амь насаараа хохирсоор байгаа.

Зөвхөн энэ сард гарсан барилгын осол аваараас хэд хэдэн жишээ дурдахад,

Жишээ нэг: Баянзүрх дүүргийн 25 дугаар хороонд “Чандмань холбоо”-ийн барилгын хоёр давхраас хамгаалалтын албаны хамгаалагч ажилтай залуу унаж бэртжээ. Тодруулбал, Чингэлтэй дүүргийн 18 дугаар хороонд оршин суудаг 25 настай эрэгтэй Г гэгч нь унаж гэмтсэн байна.

Жишээ хоёр: Хан-Уул дүүргийн дөрөвдүгээр хороонд байрлах “Шинэ өргөө” ХХК-ийн барилгын хашаанд Сонгинохайрхан дүүргийн 9 дүгээр хороонд оршин суух 36 настай эмэгтэй Г гэгч нь авто машинаар тоосго буулгаж байгаад машинтайгаа унаж гэмтсэн. Хэргийг Хан-Уул дүүргийн цагдаагийн хоёрдугаар хэлтэс шалгаж байна.

Жишээ гурав: СХД-ийн 20-р хороонд  "Тэнүүн буянт” ХХК-нд засварчин ажилтай 27 настай эрэгтэй Б гэгч нь тус компанийн автобус баазын хашааны үүдэнд “DAEWOO” маркын автобусанд хавчигдаж нас барсан хэргийг СХД-ийн цагдаагийн нэгдүгээр хэлтэс  шалгаж байна.

Жишээ дөрөв: БЗД-ийн 12-р хороонд ”Батширээт” ХХК-ний баригдаж байгаа барилга дээр Хэнтий аймгийн Батширээт сумын харьяат иргэн 25 настай эрэгтэй А, мөн сумын харьяат иргэн 23 настай эрэгтэй О нар угсардаг төмөр шат зөөж байгаад өндөр хүчдэлийн шугаманд хүрч тогонд цохиулж нас барсан байна. Хэргийг одоогоор БЗД-ийн цагдаагийн нэгдүгээр хэлтэс шалгаж байгаа юм. Эх сурвалжийн мэдээлж буйгаар тухайн компани өндөр хүчдэлийн хулгайн тог хэрэглэж байгаад ажилчид нь ийн амиа алдахад хүрсэн байж магадгүй юм.

Жишээ тав: Сүхбаатар дүүргийн 7 дугаар хорооны нутаг дэвсгэрт орших Номин хайпермаркетын барилгыг буулгахаар ажиллаж байсан 38 настай эрэгтэй Т нь  багана төмрөөс унаж гэмтэн, 31 настай эрэгтэй Б гэгч нь 6 метр өндөр багана төмрөөс мөн унаж нас барсан юм.

Жишээ зургаа: Налайх дүүргийн 2-р хорооны МСҮТ-ийн урд байрлах баригдаж буй орон сууцны барилга дээрээс 28 настай эрэгтэй О  унаж гэмтсэн хэргийг Налайх дүүргийн цагдаагийн хэлтэс  шалгаж байна.

Жишээ долоо: ХУД-ийн 11-р хороо Яармагийн гүүрнээс зүүн тийш Маршалын гүүр хүртэл өндөр хүчдэлийн шугам татаж байсан Эрчим хүчний барилга угсралтын газрын “CAT” маркийн трактор уулын уруу унаж жолоочийн бүхээгт сууж явсан иргэн 48 настай эрэгтэй Г нас баржээ.

Энэ мэт хөдөлмөрийн аюулгүй байдлаа хангаж ажлаагүйгээс үүдэлтэй хэрэг  өдөр алгасахгүй гарч байна. Үүнд барилгын холбогдох удирдлагууд цаашлаад мэргэжлийн хяналт, хяналт тавих эрх бүхий байгууллагууд анхаарч ажиллах шаардлагатай байна. Адаглаад тус барилгын үйл ажиллагаа явагдаж байгаа газрын хорооны засаг дарга анхаарал тавьж, зохих шаардлагыг тавьж байх нь зүйтэй юм.

Яг хийж бүтээх насандаа яваа залуус маань барилга дээрээс унаж, тогонд цохиулж, мод төмөрт дарагдаж амь насаа алдаж, эсвэл дахиж хөдөлмөрлөж чадахгүйгээр бэртэж байгаа нь яалтачгүй нийгмийн эмгэнэл юм.