Улаанбаатар хотод нийтийн тээврийн үйлчилгээ үзүүлдэг “Автобус-3” нийслэлийн өмчит компанийн захирал М.Цэвээн-Очир сэтгүүлчдийн нүдэн дээр ажилчдаа дарамтлав.

Тодруулбал, Тус компанийн ажилчдын эрх ашиг хөндөгдөж байгаа талаарх гомдол МҮЭХ-нд сүүлийн үед их ирэх болсон байна. Тиймээс гомдлын дагуу МҮЭХ-ныхон “Автобус 3” компанийн удирдлагууд болон ажилтнуудтай уулзаж санал бодлыг сонсохоор 15.00 цагт очсон ч Х.Амгаланбаатар Ерөнхийлөгчөөс бусдыг компани руу гаа нэвтрүүлсэнгүй. Сэтгүүлчид тус компанийн үүдэнд 40 минут хүлээгээд мэдээлэл авах эрхийнхээ дагуу орохыг хүссэн ч хамгаалагчид хэнийг ч нэтрүүлэхгүй гэж эсэргүүцсэн юм. Сэтгүүлчдийг нэвтрүүлэхгүй гэж хамгаалалтын баг гаргасан ба төв хаалгаа түгжиж хэнийг ч оруулахгүй гэсэн юм. Улмаар сэтгүүлчид болон хамгаалагчдын дунд зодоон болж, сэтгүүлчид дайрч орсон ч М.Цэвээн-Очир захирлаас яриа авч чадсангүй.

МҮЭХ-ны ерөнхийлөгч Х.Амгаланбаатар тус компанийн захирал М.Цэвээн-Очиртой уулзсаныхаа дараа ажилчдын төлөөлөлтэй уулзсан юм. Гэхдээ тус хуралд 10 орчим хүн л суусан. Учир нь компанийн удирдлагуудын зүгээс "хурал болохгүй" гэж худал хэлэн ажилчдаа тараажээ.

Гэтэл МҮЭХ-ны ерөнхийлөгчтэй хийх ажилчдын уулзалт дөнгөж эхлэх үед тус компанийн захирал хоёр ажилчнаа сэтгүүлчдийг зөвшөөрөлгүй оруулсан гэдэг шалтгаанаар дуудан дарамталсан юм.

 Тус компанийн ажилчид ажлын нөхцөл байдлыг сайжруулж, цалингаа нэмүүлэх хүсэлтэй байгаагаа олон сарын өмнөөс удирдлагууддаа хэлсэн ч хүлээж авахгүй байгаа аж. Ажилчид нь ажил хаядагаараа алдартай тус компани өнөөдөр нийслэлийн өмчид гэхээсээ илүү хувийн компани шиг аашилж байсан ба удирдлагуудынх нь дарамт ямар хэмжээнд хүрсэн нь харагдаж байлаа.

Энэ талаарх мэдээллийн дэлгэрэнгүйг удахгүй хүргэх болно.