“Гал үндэстэн” холбооны тэргүүн Ц.Мөнхбаяр Төрийн ордны гадаа зэвсэгтэй ирж, буун дуу гаргасанаар цагдан хоригдож байгаа. Түүнийг уул уурхайн компаниудыг шантаачилж хэдэн саяар нь мөнгө авдаг байсан гэх яриа тархсан ч батлагдсан зүйл алга. Харин одоо түүнийг олон нийт өрөвдөх тийшээгээ хандаад явчихлаа.

   УИХ-ын гишүүн Г.Уянга Ц.Мөнхбаярыг Урт нэртэй хуулийг батлуулахын төлөө амьдралаа гаргуунд гаргасан хүн, энэ тэмцэлдээ олон улсын шагналаар авсан 200 сая төгрөг, гурван өрөө байраа зориулсан гэхчилэнгээр өрөвдөж байна. Г.Уянга гишүүн түүнийг батлан даалтанд гаргахын тулд тууштай тэмцэнэ гэдгээ мэдэгдсэн. Г.Уянга гишүүний хувьд гадаа гудамжинд тэмцэж явсан хүнийхээ хувьд Г.Мөнхбаярыг сайн ойлгож байгаа гэх. Тэгвэл энэ эрийг батлан дааж байгаа анхны УИХ-ын гишүүн нь Г.Уянга биш.

    Хоёр жилийн өмнө буюу 2011 оны 10-р сард Ц.Мөнхбаяр нар “Нутаг чөлөөлөх хөдөлгөөн” нэрээр Уянга суманд үйл ажиллагаа явуулдаг компанийн эд хөрөнгөд халдаж сар гаруй саатуулагдаж байсан. Бас л буутай. Тэр үед Чингэлтэй дүүргээс сонгогдсон Г.Баярсайхан гишүүн батлан даалтанд гаргаж авч байсан юм. Харин энэ удаа Г.Баярсайхан “Байгаль орчноо хамгаалахын төлөө дуугарч, тэмцэж байгаа хүмүүсээ сонсч, дэмжих нь зөв. Гэхдээ хэзээ ч хүчирхийллийг зөвтгөхгүй. Тэмцэж байна гээд буу зэвсэг барьсан асуудлыг би  өмөөрөхгүй” хэмээн нүүр буруулсан юм.

   Гэсэн ч мөн л Чингэлтэй дүүргээс сонгогдсон Г.Уянга Ц.Мөнхбаярыг суллуулахын тулд тууштай явна гэдгээ мэдэгдлээ. Тиймээс заавал яагаад Чингэлтэй дүүргээс сонгогдсон гишүүд Ц.Мөнхбаярыг өмөөрөх болов? гэдэг олон нийтийн анхаарлыг татаж эхлээд байна. Г.Уянга гишүүн “адилхан тэмцэгч хүнийхээ хувьд, мөр зэрэгцэн гудамжинд жагсаж явсан хүнийхээ хувьд” гэсэн тайлбар өгч байгаа ч аль хэдийн хардлага тарж эхэлжээ. 

   Чингэлтэй дүүргээс сонгогдсон гишүүд ийнхүү Ц.Мөнхбаярыг ээлжлэн өмөөрч байгаа нь зүгээр л тохиолдол уу эсвэл...?