Жирэмсэн эмэгтэйчүүд урд хөршийн хил давж, тэнд төрөөд хүүхдээ өндөр үнээр борлуулчихаад ирдэг гэх мэдээлэл сүүлийн үед гарах боллоо. Хил хамгаалах ерөнхий газрын  Хилийн тагнуулын ажилтнуудад энэ талаарх мэдээлэл ирсэн тухай эх сурвалж мэдээлсэн юм. Тодруулбал, өнөө маргаашгүй төрөх дөхсөн 22 настай Н гэгч эмэгтэй гурван хоногийн өмнө урд хөрш рүү хилээр нэвтэрсэн. Харин буцаж ирэхдээ Монголын хилээр нэвтрэнгүүтээ галт тэргэн дотор цурхиртал уйлж гарчээ. “Би хүүхлээ хятадад зарчихлаа. Надад мөнгө хэрэгтэй байсан болохоор хүүхдээ зарчихаад ирлээ” гээд уйлаад байсан гэнэ.

    Энэ мэдээллийг авсан Хилийн тагнуулынхан хятадруу гарч буй жирэмсэн эмэгтэйчүүдийг ажиглах ажиллагааг эхлүүлсэн аж. Гэтэл дөрвөн ч эмэгтэй хэвлийдээ хүүхэдгүй эргэж ирсэн байна. Тэдгээр эмэгтэйчүүдээс зарим нэгэн мэдүүлгийг авахад “Эрээнд явж байгаад зулбачихсан. Хүүхдээ аборт хийлгээд авахуулчихсан” гэж ярьжээ.

       Энэ талаар ЦЕГ-ын хэвлэл мэдээллийн ажилтан, цагдаагийн ахмад Ё.Лхагвасүрэнгээс тодрууллаа.

- Хятадад хүүхдээ зарсан гэх зургаан эмэгтэйг шалгаж байгаа гэх мэдээлэл байна. Үнэн үү?
- Хятадад хүүхдээ аваачиж зардаг гэх мэдээлэл байгаа. Гэвч гадны улсад үйлдэгдсэн гэмт үйлдлийг эрүүгийн хуулийн зүйлчлэлээр шалгах эрх бидэнд байхгүй.  Тухайн улсад үйлдэгдсэн гэмт хэрэг тухайн улсын эрүүгийн хуулиар шийдэгдэнэ. Монгол Улсын хуулинд “өөр оронд гэмт хэрэг үйлчихээд Монгол Улсад ороод ирсэн манай улсын иргэнийг бид тухайн улсад ялыг нь эдлүүлэхээр хүлээлгэн өгөхийг хориглодог” заалт бий.  Өөрөөр хэлбэл, бусад оронд өөрийн улсын иргэнийг ял эдлүүлэхээр шилжүүлэн өгч болохгүй гэсэн заалт байдаг. Улс нь иргэнээ хамгаалж буй том хэрэгсэл юм. Тэр хүн буцаж явахгүй нутагтаа чөлөөтэй амьдрана гэсэн үг. Тэгэхээр тэр хүний хийсэн хэрэг тухайн улсад л шийдэгдэнэ.

- Тэгэхээр тэдгээр эмэгтэйчүүдийг хуулийн байгууллагад шалгаж байгаа гэх мэдээлэл худал гэж ойлгож болох уу?
- Шалгах үндэслэлгүй. Харин энэ гэмт үйлдлийн анхны үүсвэр нь хаана юм бэ гэдгийг тогтоож болно. Тэр хүн өөрөө сайн дураараа хүүхдээ зарсан уу, бусад хүмүүс зуучилж заруулж байна уу гэдгийг бас шалгах ёстой. Хилтэй холбоотой, хил давж үйлдэгдэж байгаа хэрэг учир Тагнуулын ерөнхий газар харьяаллын дагуу шалгах учиртай гэлээ.

      Ямартаа ч хэрэв эдгээр эмэгтэйчүүд сайн дураараа хүүхдээ аваачиж өндөр үнээр зардаг бол тэдэнд хүлээлгэх хуулийн хариуцлага байхгүй юм. Харин зуучилдаг, албадан заруулж буй этгээд байгаа бол тэр хүнийг нь илрүүлж таслан сэргийлэх арга хэмжээ авч болох аж.