Ц.Нямдоржийг Хууль зүйн сайд байхад “эрүүгийн” гэх гэмт хэрэгтнүүдийг дарсан, харин Х.Тэмүүжингийн үед гаарах боллоо гэсэн яриа гарах болсон. Ялангуяа УИХ-ын гишүүдийг шантаажилдаг эс бөгөөс тэдний захиалгаар бусдыг айлган сүрдүүлж мөнгө авдаг бүлэг этгээдийн тухай мэдээлэл илэрч эхэлсэн. Харин үүнд Х.Тэмүүжин сайд тайлбар хийхдээ харин ч Ц.Нямдоржийн үед дарагдаж, нуугдсан хэрэгтнүүд өнөөдөр илэрч эхэлсэн гэлээ. Түүний хувьд дээрх мэдээллийг зохион байгуулалттайгаар тараасан гэж үзэж байгаа бөгөөд эрүүгийн гэмт хэрэгтнүүдийг шалгаж эхэлсэнтэй холбоотой гэсэн тайлбар өгч байна.

    Х.Тэмүүжин сайдын хувьд гэмт хэргийн замаар амьдардаг, үүнийгээ байнгын ашиг олох хэрэгсэл болгодог этгээдүүдийг илрүүлэхийн тулд тусад нь мөрдөн байцаах алба  байгуулахаар болсон байна. Учир нь өөрсдөө гэмт хэрэгтнүүдтэй холбоотой, тэднийг өөгшүүлдэг, харж үздэг, хамгаалуулах гэж оролддог улс төр бизнесийн бүлэглэл  олон болсон байна. Энэ нь ч сүүлийн үед улс төрчдийн хэрүүл дундаас цухалзах болсон. Тэрбээр “Гэмт хэрэгтнүүдийг тэжээж тэтгэн, өөрсдийгөө хамгаалуулдаг уламжлал байсан гэдэг нь аюултай. Тэр эрүүгийнхэн гаарлаа гэх мэдээллүүдийг шалгахад дандаа дарагдсан хэргүүд байдаг” гэсэн юм.

   Мөн сүүлийн үед эрүүгийнхэн гэх хаягтай этгээдүүдийн бүр цаашлаад хүүхдүүдийнх нь гэмт хэрэг илэрч эхэлснийг зарлалаа. Энд Дамбын Хишгээгийн хүү мөн УИХ-ын гишүүн хүн хутгалсан, хутгалуулсан гэх хэрэг багтаж байгаа бололтой. 

   Үүнээс гадна сүүлийн зургаа, долоон жилд үндсэрхэг үзэл, байгаль хамгаалах нэрийдлээр үйл ажиллагаа явуулдаг гэх хэрнээ айлган сүрдүүлж, мөнгө олдог хүмүүсийн тоо ихэссэн. Тэднийг ч шинээр байгуулагдах мөрдөн байцаах албаныхан шалгах аж. Гэхдээ энд хамгийн их тулгарч байгаа асуудал нь өнгөрсөн хугацаанд, бүр тодруулбал Ц.Нямдоржийг Хууль зүйн сайд байх үед рецедев, эрүүгийн хэрэгтнүүд цагдаа нартай найз, нөхөд болсон байгаа нь шалгахад хүндрэл учруулжээ. Тиймээс цагдаа нарын томилгоог өөрчилж, Мөрдөн байцаах албанд шинэ боловсон хүчнүүдийг цуглуулах бодлого барьж байгаа аж.