Эдийн засгийн хөгжлийн сайд Н.Батбаяр Чингис бонд бол өр биш, Чингис хааны бидэнд өгсөн хишиг хэмээн нэрлээд байгаа. Энэ мөнгөөр авто зам, дэд бүтэц, эрчим хүч, техник шинэчлэл, барилгын материал, орон сууц зэрэг салбарын 204 төсөл хэрэгжүүлэхээр болж, 930 тэрбумыг нь зарцуулаад байна. Гэсэн ч иргэд энэ төслүүд чанартай хэрэгжиж байгаа эсэх, эргэн төлөх хүүгийн дарамт үүсэх зэрэгт санаа зовсон хэвээр.  УИХ-ын гишүүн Л.Энх-Амгалангийн тооцоолсноор бид Чингис бондын хүүнд хагас жилд 35 сая ам.доллар, өдөрт 270 сая орчим төгрөг төлж байгаа юм.

   Гэтэл Н.Алтанхуягийн Засгийн газар өр нь дуусаагүй Чингис бондыг дахин гаргана гэдгээ мэдэгдлээ. Өмнө нь Шинэчлэлийн Засгийн газар 1,5 тэрбум ам.доллар авч байсан бол 2014 онд 2,1 тэрбум ам.долларын бонд босгохоор аль хэдийн бэлджээ. Дэлхийн зах зээл дээр дахин ийм хэмжээний бонд гаргавал манай гадаад өр дотоодын нийт бүтээгдэхүүний 50 хувьтай тэнцэнэ. Хэрэв үгүй гэвэл 40 гаруй хувьтай байх аж. Гадаад өр ДНБ-ны 50 хувьтай тэнцэнэ гэдэг дээд цэг. Үүнээс хэтэрвэл дампуурах шинж рүүгээ орно гэдгийг эдийн засагчид хэлсээр байна. Гэтэл дахин Чингис бонд гаргаж гадаад өрийг 50 хувьд хүргэнэ, дээр нь Японоос “Самурай” бонд гаргана гэж байгаа нь шүүмжлэл дагуулж эхэллээ.

     Хөгшин Европыг эдийн засгийн хямрал руу чирсэн Грек улсын өр ДНБ-ийхээ 80 хувьд хүрсэн байдаг. Ийм жишээ байсаар, эдийн засагчид ярисаар байхад манай улс төрчид дахин бонд босгохоор улайрч эхэллээ. Н.Батбаяр сайдын хэлж байгаагаар Чингис хааны бонд бол өр, зээл биш хишиг учраас санаа зоволтгүй аваад, үрээд болохоор эд аж. Тийм ч учраас энэ их зээлийн хүүг хэн, хэзээ төлж барагдуулах вэ гэдэгт сайд нар санаа зовохгүй байгаа бололтой. Ямар сайндаа "Чингис" бондоос аймаг бүрт 6 тэрбумыг хишиг болгон өгнө хэмээн Ерөнхий сайд Н.Алтанхуяг ам гарах вэ? Өр, хүүгээ хурдан төлж дуусгахын оронд аймгуудад хишиг тараагаад явна гэдэг юу гэсэн үг вэ? Ер нь Ардчилсан намынхан Чингис бондыг хариу өр нэхдэг "хэцүү эд" гэдгийг мартаад, эзэн Чингисийн хишиг гээд дүрдээ итгээд яваад байх шиг. Эсвэл Чингис бондын өр нэхэгдэж, иргэдийн нуруун дээр ирэх цагт өөрсдөө хариуцлагаас холдож, албан тушаалаа өгсөн байна гэж төсөөлж яваа юм болов уу?