“Нарантуул 2” зах шатсан асуудал олны гайхширлыг төрүүлж байгаа. Учир нь хэдхэн сарын өмнө “Нарантуул 1” зах шатаж олон хүнийг хохироож, нэг хүний амь эрсэдсэн.  Улмаар эхний гал цахилгааны асуудлаас болж гарсан гэсэн дүгнэлт гарсан. Тэгвэл “Нарантуул 2” захын галын шалтгаан ч цахилгаанаас болсон гэсэн урьдчилсан дүгнэлт гараад байгаа юм. Харин энэ дүгнэлтийг “Нарантуул 2” захын удирдлагууд эсэргүүцэж байгаа төдийгүй, онцгой байдлын ажилчдыг хоёрдахь гал гарсанд буруутгаж байгаагаа хэлсэн юм. Тиймээс бид энэ удаад Нийслэлийн онцгой байдлын газар, ЦЕГ-ын байр суурийг хүргэж байна.

Нийслэлийн онцгой байдлын орлогч дарга, хурандаа Д.Эрдэнэбаатартай “Нарантуул 2” захын галын шалтгааны талаар ярилцлаа.

-“Нарантуул 2” галын шалтгаан, дүгнэлт гарсан уу?
-Нийслэлийн онцгой байдлын аврах шуурхай бүрэлдэхүүн тухайн үед гарсан галыг бүрэн унтраасан байгаа. Тухайн үед “Нарантуул 2” худалдааны төвийн А зааланд байсан 104 лангуунаас шаталгад өртсөн 28 лангуу байгаа. Бусад лангуу, павилонийг аварсан.

Хоёрдахь дуудлага бол мөн өдрийнхөө 02.43 минутад ирсэн. Бид гал түймрийн дуудлагаар 02.51 минут гэхэд хүрэлцэн очсон. Ингэхэд  “А” зааланд байрлах нэг, хоёрдугаар лангуу  шатахад хүрсэн байсныг унтраасан байгаа. Үүнд нэг зүйл хэлэхэд, хэвлэлээр гараад байгаа шиг  онцгойгийнхон дутуу унтраасан, өөрсдийнх нь хариуцлагагүй байдлаасаа болж дараагийн гал гарсан гэдэгтэй бид санал нийлэхгүй байгаа. Тухайлбал, бид их хэмжээний гал түймэр гарсан галын голомт дээрх үлдэгдэл, шатлагад үлдсэн зүйлсийг бүрэн унтраадаг. Түүнийг нүдээрээ хараад унтраачихдаггүй. Дулаан мэдрэгч, утаатай, харанхуй орчин бүх нөхцөлд ажиллах чадвартай нано технологийн камераар  харж,  гал унтраах үйл ажиллагаандаа ашиглаж, задаргаа хийж, галын голомт үлдэж үү үгүй гэдгийг хянадаг.

-Хоёр дахь гал юунаас болж гарсан юм бол. “Нарантуул” захын удирдлагууд бол эхний галыг бүрэн унтраагаагүйгээс үүдэлтэй гэж үзэж байгаагаа хэлж байсан?
-Үүнийг бид хэлж мэдэхгүй. Цагдаагийн байгууллага тогтоох байх. Эхний үед гал баруун урд хэсэгт байрлах газраас гарч 28 лангуу шатлагад өртсөн байгаа. Шатлагад сүүлд өртсөн хоёр лангуу өртөөгүй байсан. Нэг, хоёрдугаар лангууны хажууд байрлах гуравдугаар лангуу зэрэг тухайн үед шатлагад өртөөгүй. Үүнийг бид  хэргийн газраас авсан зурагнуудаар  баталж байгаа. Гарсан шалтгааныг бол цагдаагийн байгууллага тогтоох байх гэж найдаж байна. Мөн энд бүх тог цахилгааныг салгасан байсан. Ингээд цаашаагаа бол шатлагад өртөөгүй юм аа гэдгийг энэ олон зурагнууд дээр харагдаж байгаа. Дээр нь тэнд ажиллаж байсан 51 онцгой байдлын албан хаагчид харж байсан. Тухайн үед үзлэгийг анх хийхэд ирж байсан Шүүх шинжилгээний үндэсний төвийн олон шинжээч нар, хэрэг бүртгэх мөрдөн байцаах алба, цагдаа, ЦЕГ-ын онц хүнд гэмт хэрэгтэй тэмцэх тасаг, хэлтсийнхэн хүртэл ирж үзлэгийг хийсэн. Тиймээс  тэд эхний галаас улбаалж хоёр дахь гал гарах боломжгүй гэдгийг гэрчилнэ.

-Тэгэхээр цахилгааныг салгасан байсан төдийгүй эхний галыг бүрэн унтраагаад бүх хаалга үүдийг цоочилж цагдаагийн байгууллагад түлхүүрийг хүлээлгэж өгөөд явсан гэж байна. Ийм байхад хоёрдахь гал гарна гэдэг санаатайгаар гал тавьсан гэж ойлгогдохоор байх юм?
-Үүнийг бол хэрэг бүртгэлт, мөрдөн байцаалтын явцад тогтооно. Түүнээс биш хэн хэнрүүгээ шуурч, олны сэтгэл санааг үймүүлмээргүй байна. Хэрэг бүртгэх мөрдөн байцаах ажиллагаа нь хуулийнхаа журмын дагуу явагдах учраас үүнийг гарсаны талаар ярих хэрэгтэй байх.

-Мөн та бүхнийг түлхүүрээ цагдаагийн байгууллагад шилжүүлж өгчихөөд явсаны дараа гал гарахад “Нарантуул”-ын түрээслэгчид хоёрдахь галыг унтраах боломжтой байсан ч орж чадаагүй гэж зүйл яригдаж байна?
-Бид тэгж удаан хүлээлгэсэн зүйл байхгүй. Гал түймэр гарч байхыг хараад л дуудлага өгсөн байгаа. Анх дуудлага өгсөн хүн нь Анххуяг гэх харуул нь байсан.

-Танайхаас анх цахилгаанаас гэсэн урьдчилсан дүгнэлтийг гаргасан. Үүнийг чухам ямар үндэслэлээр  хэлсэн бэ?
-Цахилгаанаас гэдгийг онцгой байдлын газраас нэг ч үг дурсаагүй.  Яагаад гэхээр хэрэг бүртгэлт мөрдөн байцаалтын ажиллагаа явагдаж байгаа. Энэ үйл ажиллагаа бол нууцын зэрэглэлтэй байдаг учраас энэ дээр ямар нэг байдлаар дүгнэлт бол гараагүй. Хоёрдугаарт, “Нарантуул 2” дээр гарсан хэргийн талаар шинжээчийн дүгнэлт ч гараагүй байгаа . Шинжилгээ хийх материалууд нь цуглагдаад дөнгөж шинжээч дээр явж байхад шууд  тэрийг цахилгаанаас гарсан гэж хэлэхэд эрт байна.

-“Нарантуул 2”-ын удирдлагуудын хэлж буйгаар эхний галыг унтраасны дараа ийм хэмжээний хөөс, усаар галыг ингэж унтраалаа гэдэг нотлох бичгийг өгөх ёстой. Гэвч та нарыг өгөөгүй гэж байсан?
-Тэр бичгийг тэд нарт өгдөггүй юм. Гал түймэр унтраасан тухай актийг хэрэг бүртгэх мөрдөн байцаалтын нэмэлт зүйл болгож бид актаа гаргаж өгдөг. Гал түймэр гарсан тухай актийг нотлох баримт болгож бичиж өгөх ёстой. Учир нь энэ бол засгийн газрын тогтоолоор гаргасан бичиг баримт. Тиймээс бид шууд л акт гаргаж өгөх боломжгүй.

Тэгвэл энэ талаар ЦЕГ-аас ямар байр суурьтай байгааг хүргэж байна.

- “Нарантуул 1” дээр гарсан галын дүгнэлтийг бараг сар гаруй ажиллаж гаргасан байж хоёрхон хоногийн дотор хоёр дахь галын дүгнэлтийг гаргалаа гэж удирдлагууд нь үзэж байна. Энэ дүгнэлт хаанаас үндэслэлтэй вэ?
- “Нарантуул 2” худалдааны төв дээр Чингэлтэй дүүргийн цагдаагийн хоёрдугаар хэлтсийн албан хаагчид ажиллаж байна. Өчигдрөөс энэ худалдааны төв дээр гарсан цагдаагийн хамгаалалтыг буулгасан. Гал гарсан заалыг битүүмжилж цоожилсон. Нөгөө талынх нь заалыг “Нарантуул 2”-ын захиргаанд хүлээлгэж өгсөн байгаа. Цагдаагийн байгууллагаас явуулж буй мөрдөн байцаалт, хэрэг бүртгэлтийн ажиллагаа дуусч байна. Тухайн иргэдийн хохирсон хохирлыг тогтоох, хэргийн учир шалтгааныг олох тал дээр ажиллаж байгаа. Мөн мэргэжлийн байгууллагуудын дүгнэлт хараахан гараагүй байна. Энэ дүгнэлт эцэслэн гараад ирэхээр цагдаагийн байгууллага эцсийн дүнгээ хэвлэл мэдээллийнхнээр дамжуулан хэлнэ.

-Хэргийн шалтгааныг урьдчилсан байдлаар цахилгааны гэмтлээс гэж хэлсэн. Энэ дүгнэлтийг хаанаас гаргасан бэ?
-Урьдчилсан байдлаар цахилгаанаас үүдэлтэй гал гарсан гэсэн дүгнэлтийг “магадгүй” гэж хэлсэн. Үүнд шинжээчдийн байгууллагуудын нарийн шинжилгээний дүнг харж байж эцэслэн тогтоогдоно. Нийслэлийн онцгой байдлын ерөнхий газрын галын шинжээчдийн  дүгнэлт, цагдаагийн байгууллага бусад мэргэжлийн байгууллагатай хамтарч хэргийн газарт үзлэг хийсэн. Ингээд ийм байх магадлалтай гэсэн эхний дүгнэлт гарсан. Гэхдээ яг нарийн дүгнэлт гараагүй.

-Одоогоор сэжигтнээр татсан хүн байгаа юу?
-Хэдэн хүн сэжигтнээр татсаныг хэлэх боломжгүй. Гэхдээ саатуулсан хүн байхгүй.